Kum 50 Chhunga Thenzawl Sport lam a a dinhmun tlangpui.

Kum 1968 leh 2018 Kum 50 Chhunga Thenzawl Sport lam a a dinhmun tlangpui.

~Hmuna Chawngthu

 

Thenzawl hi Sport lam ah Mizoram a avantlang kan ni phak ve angem aw, tih hi ngaihtuahna ah a awm țhin. Engpawhnise, kan dinhmun chiah hrechiang tur chuan bul deuh tak, he Thenzawl khaw hmun a kan lo awmkhawm tirh aṭanga kan dinhmun ațangin a tlangpui in chhui chhin teh ang u.

Kum 1955 vel daih tawh khan tuna Thenzawl khaw hmun ah hian helai phaizawl a Leilet nei ho te, In 20 vel lo khawsa in Model tih hming alo pu a, In chung Rangva te pawh sawrkar in a pek a ni. Kum 1966 ah Mizoram a lo buai a, tichuan India president Thupek in Mizoram thingtlang khaw hrang hrang sawikhawm anih khan, he khaw hmunah hian khaw 6 sawikhawm a ni a:

• Thenzawl
• Lungrang
• Zote
• Neihloh
• Buangpui
• Kanghmun South

Heng khaw paruk te hi hemi khaw hmun, Model hmun ah hian 1968 kum in sawi-khawm a ni a, a hmingah Thenzawl tih chu vuah a ni a. (A khaw hmun hi Thenzawl ram a ni) Heng sawikhawm zingah hian Zote hi sawikhawm hnuhnung ber an ni a, 1968 April ah an rawn chhuk ve a ni. Tichuan tuna Forest awmna Phaitetlang ah khian India Sipai Rajput Regiment awm in, Thenzawl leh a chhehvel khua te an awp a, tichuan Rajput ho chuan an Parade na tur leh Rising day hmanna turin Thenzawl pa leh Țhalai zawng zawng chu, Field an laih tir a, hlawh awm lovin, Sipai in tihluihna a laihtir anih bawk avangin 1968 May thla ral hmain Field chu laihzawh a ni a, a hming ah pawh Rajput field tih a ni ta a. Tichuan Sipai ho te'n parade nan te an hman bakah, Thenzawl khaw Grouping chu In leh lo te dinfel alo ni ta a, Infiammi te vengtina, rambuai hma a inkhel țhin (Hockey) te chu lo tho chhuakin Maubul kawm suihmâm leh thingchang suihmûm hmangin Hockey chu Rajput field ah chuan an khel ve țan ta a, (keini pawh naupang kan niin chhunlai field awllai chuhin kan inkhel ve țhin) Tichuan kum 1969 lo in herchhuakin, rambuai thimchhah zual alo kiang hlek a, a tuizual te rilru ah Infiamna Hockey khelh châkna alo lian zel a, Thenzawl ah pawh Mumal taka Games and Sports lam a hmalak duhna alo awm a. A tawi zawngin sawi mai ila - 

Thenzawl ah chuan a hmasa ber atan Games and sports Association inthlangin, Pu C. Lalkima (L) chu President hmasa ber a ni ta in ka hria, ka hriat sual chuan thupha ka chawi e. Tin, Infiamna lam kan luhchilh tawh dawn avangin mihring hming sawi ngai te a awm dawn a. Ṭhenkhat chu min boral san tawh te an niin an chhungte leh, a la dam te pawh an mahni rawn hmasa lem lovin mimal hming ka rawn lam ri dawn a, hriatthiamna ka rawn dil e.

Tichuan kum 1969 kum in a hmasa ber atan Hockey Tournament chu Rajput field ah hian neih a ni a, Thenzawl chu a veng veng a team siam a ni tlangpui a. Khaw hrang hrang kha veng bik nei a awm anih avangin Veng hming ah pawh khawhlui hming an pu tlangpui. 

Tichuan 1969 kum Hockey tournament hmasa ber ah hian Zote veng team leh Lungrang Veng team ten Final khel in Zote hi 2-1 in an chak a, Thenzawl Grouping a Hockey champion hmasa ber chu Zote Veng team an ni.

Kum 1970 a lo in her chhuak a, Pu Rosanga nita in ka hria, PWD lam a thawk, SA awm khan a fapa Rinthanga pual in Shield lian tak mai Running turin a chhuah a, kum 1970 kum hian Tournament ropui tak siam a ni a, Sialsuk khua pawh team 3 vel lai an lo kal a, a tawp ah Sialsuk 'A' team leh Lungrang 'A' team ten Final an khel a, Lungrang 'A' team hi 2-0 in an chak a, Rinthanga Champion-ship Shield chu Lungrang veng 'A' team in an la hmasa ber a ni.

1971 kum hian he Shield hi chhuah a ni leh a, hemi țum hian Serchhip in an la ve thung a, 1972 ah chhuah a ni leh a, Lungrang 'A' team leh Buarpui 'A' team ten final khel in Lungrang 'A' team ten a vawihnih nan Shield chu an la leh ta a. Kum 1973 ah he Championship Shield hi chhuah a ni leh a, Lungrang Veng team te an champ leh chuan an nei hlen tawh dawn a, mahse Semi final thleng zolo in an tla a, Thenzawl Centre team leh Sialsuk ten final khelin hun pangngai a inhneh tawkin hun pek belh ah pawh an la inhneh tawk a, a tuk lehah final hi khel țha leh in Thenzawl Centre team te an champion ta a ni. Thenzawl Centre team ah hian Pu Roenga te, Pu Biaktluanga te, Pu Valbuanga te hi a lar leh a thiam zual te an ni a, naupangho kan inkhelh ve pawhin Pu Roenga, Pu Biaktluanga, Pu Valbuanga tih te sawiin an mahni nih kan inchuh laih laih țhin. Tin, heng ka sawi bak ah hian Inkhelh thiam lar zualte chu - Pu Hnehzela, Pu Ch Lalngena, Pu Zarthanga, Pu Thanngura, Pu Rengliana, Pu Thangmura, Pu Ngurchhawna Vengchhak, Pu Lalliana te hi hockey thiam, Thenzawl in kan neih hming langsar zual te an ni a, midang pawh an awm nual. Tin, henglai hun hian kan field hi alian lova, Team khat ah player 7 a khelh a ni tlangpui a, player te chu zawnchhuah ngai khawp a an inhliam anih loh chuan player inthlak, Subtitution hi a awm tih kan hre ngai lo reng reng a, thlak ngai nih kha chu zahthlak a ngaih a ni lek lek. Vawikhat pawh Goal bul, Circle chhungah an inchuh luih luih a, U Vurtea hi goal vengtu a ni a, bawl chu a țhutbet a, a thawh hun nghak in an tiang chu lekin a țhenin vuak goal tumin an tin a, ațhen U Vurtea lam țangho lahin a goal loh nan a vuak sawn hman tumin an tiang an lek bawk. U Vura lah tho duh bik silo, a thawh vaih chuan a chunga thil lo thleng tur a hai bik si lo, atawp ah a thawh hmain a kutin a ball Țhut beh chu la in a theih pa tawp in lehlam ah ball a vawm phei vak a, a hamtu in a hamrik ham lai chu a chhan hre bik miah lovin an ham ri vak a, tichuan ball vawm phei kha awih anih leh nihloh sawiin, reife chu Inkhel a khaihlak a, a tawp a, engmah buaina awm lo leh U Vurtea pawhin Card leh hremna engmah hmu ta chuang lovin a khel chhunzawm leh ta mai bawk a, an sawifel thei ta miau si a. Tin, heng hun lai Hockey tournament hi Inkhelpui tia sawi a ni mah mah țhin, kan rilru ah pawh Tournament tih ai chuan, "Inkhelhpui" tih kha a fiah ber. Inkhelhpui a awm reng reng hian Rajput field sir, khawchhung lam pang phei zawng zawng saw chu Dawr in a khat vek a, a nuam thei hle. Inkhel tur te hi a intlar inzui zawng a tlarin kilkhat ațangin goal vengtu in hma a hruai a, a kut a Hockey ball keng chungin an rawn tlan chhuak țhat țhat a, mipuiin kut kan lo beng dur dur a, Centre an thlen in ball kengtu in leh lam goal lam hawiin zawite in a lir a, a țhian ten ball chu rawn khalh nghalin goal ah an va vaw lut kher țhin. A tlangpui in Thenzawl inkhelh hi en a nuam in, intithinrim emaw insual phah ta emaw kha an awm ka hre ngai lova, khaw țhenkhat ah sawi awm zeuh zeuh mah se, Thenzawl inkhel hi a hmuh a hahdamin, intihbuai na lam ah a tel ka hre ngai miahlo. Tin, mikhual leh khawtual inkhelh a fello taka tih ang chi hi Thenzawl ah hian a awm ka hre ngai miah lo.

1973 vel ațang hian tuna kan field "Loțhazawl" hi Phulrai zawl zau nuam em em a ni a, mahse inkhel nana hmang thei tur chuan chei rual deuh ngai a ni a, a tawi zawngin sawi ila. VC te leh Game hruaitu te hmalakna in Loțhazawl chu Inkhelh theih tura chei bawl a ni ta a, Rajput field hi chu a tet bak ah mimal ram te alo ni bawk nen, tichuan kum 1973 hian he kan sawi Shield lian nilo tournament tenau deuh chu tuna kan Loțhazawl field ah hian an khel țan ta a, team khatah player 9 te Player 11 te in an khel ve ta a, hemi kum 1973 kum hian kum "1966 rambuai avang a khaw sawikhawm te an duh chuan an mahni khua ah an kir leh thei ang," tiin, India president thupek chhuah a ni a, khaw tam tak, mahni khaw hlui ah an kir leh a, keini Thenzawl khua sawikhawm khaw țhenkhat te chu anmahni khua ah an kir nual a. Zote, Neihloh, Kanghmun south te hi kir leh țhahnem deuh an ni a, Lungrang hi In 20 vel an kir leh bawk. Hockey inkhelhpui pawhin inkhel tur vak an awm lem lova, High school  te kha an chhuak ve țhin bawk.

Kum 1974 ah chuan Shield lian chuh Hockey inkhelhpui hun alo herchhuak leh a, hemi țum hian team chhuak pawh an țhahnem khawp in ka hria. Thenzawl Centre team Pu Roenga Capt. na team leh Lungrang 'A' team Pu Ch. Lalngena Capt. na in final hmuhnawm tak mai khelh a ni a, hemi tum hi Thenzawl Hockey inkhel final Hmuhnawm ber țum a ni awm e, an inhneh tawkin an thiam tlang a, Lungrang 'A' team lam a Pu Hnehzela leh Pu Zadingluaia (assam regmt) te'n mit an la zual a. Thenzawl Centre team ah Pu Biaktluanga leh Pu Roenga leh Pu Ngurchhawna te che vel tluk a khang hun lai titi luah tu kha an vang khawp ang. 2-0 in Thenzawl Centre in chakna changin Champion an ni ta a ni.

    Awle, a tawi zawngin - Kum thum la zawn an awm loh avang leh Boruak te a dai telh telh bawk nen, he Hockey Championship Shield lian hi a lo hlui in ahmel a lo chuai ve telh telh a, tin, a kar lak ah hian kan sawi telh lem loh, Belpui lian inchuh Inkhel hi a awm ve fo tih hre bawk ila. 'Tiang chuan Thenzawl hi Hockey ah na na na chuan Kan khaw chhehvelah a sang pawl kan ni chho ve reng a, kum 1980 alo in her chhuak chho a, Thenzawl ah chauh lo pawh hmun dang ah pawh Hockey game lam a dai hret hret a, Football game  in hmun a luah ve tial tial a, kan khua ah pawh Football leh Volleyball a rawn lar chho ve ta zel a. Tuna Pu Rohming-thanga Field veng te in hmun vel ah sawn Volleyball Court awm in, tlaitin Volleyball beng hmuh tur an awm chho va, tin, football khel  an awm bawk. A hmaa kan sawi angin Thenzawl Infiamna chu Game and Sport association kum tin a hruaitu thlan thar thin ten kaihruaiin, Inkhelpui (Tournament) te pawh an la buatsaih ve zel a, (Heng hun lai hian Zirna avangin kum 10 aia tam mah hmun dangah ka awm avangin kan veng Sport dinhmun hi ka chiang lutuk lem lo) Zawi zawiin football lo lar chho zel chuan kan khaw chhehvel te atuam chhovin, Thenzawl tour-nament ah pawh kum 1987 chho vel ațang khan Kanghmun S hi kan hnehlo fo mai bawk. 

Tichuan kum 1990 kum in Hockey tournament chu Thenzawl ah hian a awm leh a, hei hi kum engemawzat atan a Thenzawl a Hockey tournament awm hnuhnung a ni rih in ka hria a. Tuna SAI Women Hockey training Centre awm hnu hian an chhunzawm leh in ka hria. 

He Hockey Tournament 1990 kuma awm hi eng Trophy nge anih ka hre thei ta mai lo. Bazar leh T.A.U team te inkhel in 2-1 in Bazar-in hnehna changin an champion a, hemi țum hian T.A.U team ah hian ka tel ve nghe nghe.

   Heng hun lai atang hian Thenzawl ah Football Game in hma a sawn ve zel a, kan chheh vel khua ah pawh Football game ah chuan a sang pawl kan ni ve. Tin, Volleyball game nung chho ve zel bawk mah se, kan khaw chhehvel kan la um deuh in a lang thung.

Kum 1993 ah chuan Thenzawl Zone Football Association lo piang ve ta in, 1994 ah a in-form nghet tak tak ve ta a, heta Zone FA a President hmasa ber chu Pu C. Hmingthanmawia a ni nghe nghe awm e. Mahse MFA atangin Zone hi an la rawn awp mai niin a lang, a chhan chu Serchhip district a la piang lo tlat. Tin, Tual-chhung football khelh leh Tournament buatsaih chu GSA kut ala ni tlangpui. Annin Football leh Volleyball tournament an buatsaih țhin a, khualkhua te an chah a, a changin khual ah te pawh an chhuak ve thin bawk. Heng hun lai hian MFA hian Zone hrang hrang ațhente hi Zone 7 vel hi Group ah siam leh in, chumi Zone Group Cham-pionship chu a awm leh țhin a, Thenzawl pawh hetiang ah hian Group ṭhenkhat titha, Aizawl a khel leh tura tling zingah a tel ve nual mai. 

Infiam lam a kan changkan hret hret ang zel in a Technical lam ah pawh hma kan lo sawn chho ve zel a, Qualified Refree te kan khaw mi an lo awm ve zel a. Tin, inkhelh dan pawh mumal zawkin Game and Sport ah Affiliate te ti ve in, kal alo ni ve ta zel a. Kum 2000 a lo inher chhuah chuan Football ah leh Volleyball ah kan chhehvel khua te huphurh khua kan lo ni ve ta reng mai a, Volleyball pawh Club te din in Thenzawl khawchhungah Tournament te siam in, Football nen a inchhawk mawi tawk a neih reng anih țhin avangin game alo nung chho ve zel a, Volleyball lam ah chuan Dynamic Volleyball Club te, Bazar Volleyball Club te, Thluangtea VC te, Mascot Volleyball Club te awm in, Tournament pui deuh zawk te pawh neih țhin a ni a, Serchhip nen kan inbuan tawk vel khawp mai a, Volleyball lam ah chuan kan player lar zual C. Vanlal-munga leh Zohmingliana te phei chu Serchhip District ah hian an aia țha bik sawi tur an awm bik lo. Tin, Football lam ah pawh Thenzawl player Zodinsanga te han khum tur hi Serchhip district ah an awm bik lo.

    Tin, kan sawi hmaih. Kum 1991 kum hian kan Loțhazawl field, a laia motor kawngpui kal tlang ruah, kawngpui ațanga khaw chhaklam Football field kawng thlang lam, naupang inkhel nan a hman thin chu Mizoram in North East Sport Festival a thleng dawn a, chutah chuan kan field zau țha tak mai chu 4 Hundred Track atan Sawrkarin rawn siam in kan field chu a rawn lai a,  hemi kum a North East Sport Festival a Athletics hi Thenzawl ah kan thleng nghe nghe a ni. Hemi hnu lawk hian kan khua ah pawh SYS ațangin athletic Coach Pu Thankima chu rawn awm in, eng emaw chen Thenzawl ah a awm nghe nghe a ni.

   Kum 2004 ah chuan kan field zau tak mai, a zatve Football field puitling, a zatve hman loh a awl huai chu SAI Women Hockey Traning Centre ah sawrkar in siam in, Hockey khelhna Grass nuam lutuk mai phah in nula engemawzat training in, Mizoram aiawh te, India ram Aiawh tein he Thenzawl Women Hockey training Centre a țraining mek te hi an kal ta zauh zauh reng a, High school leh Higher Game ah phei chuan Hmeichhe Hockey chu Thenzawl  School te ta a ni ta ringawt mai a ni. Tun thlengin Mizoram hmun hrang hrang ațangin Nula engemawzat he SAI woment Hockey Training Centre ah hian an training mek a, tun hma kum 1980 hma lam a Hockey thiam khua kha, Thenzawl ah Hockey a nung thar leh mek bawk.

    Kum 2005 September thla ah Thenzawl Volleyball Game chu kalphung thlakin GSA kuta awm țhin chu, Thenzawl Zone Volleyball Association a rawn ding thar ta a, Volleyball Game chu zone Volleyball kut ah dah a ni ta a,  President hmasa ber Pu Thangchungnunga Teacher LLV High school a ni. Tichuan, volleyball lam ah pawh player țha tak tak lo chhuakin mizoram aiawh tur a feh chhuak thei pawh engemawzat an lo awm a, tun thleng pawh in Mizoram Volleyball inelna sang ber Mizoram Pro Volleyball League ah pawh mipa 2 leh Hmeichhe 3 kan nei a, Mipa pro player te chu, Lalhminghlua leh C Lalthan-hlua ten Pro Volleyball League hi khel in, Hmeichhia ah Melody Lallawmkimi, R. Lalrinpuii leh R. Malsawm-tluangi te an ni a. Tin, India ram pum inelna lian ah Melody Lallawmkimi hian khel tawh in, ni 22 April National Mini Volleyball Tournament Aizawl a neih zawh tak ah Lalhlimawmi Thenzawl Kanan veng a tel nghe nghe a ni.

    Tin, Taekwondo lam leh Wrestling lam ah hian Mizoram champion leh Mizoram aiawh tur a thlan chhuah te pawh engemawzat awm tawhin, kum 2011 a Pa te Inchai mizoram champion pawh Lalawmpuia Thenzawl niin, Taekwondo ah pawh India champion, K. Lalngaihawmi Thenzawl kan nei bawk.

      Tun dinhmun ah chuan Sport hian kan khua min chiah hneh viau a, mahse rampum huap inelna ang chi ah tun aia langsar leh zual tur leh, tun aia hmasawn na nei tur chuan țan lak deuh kan la țul hle mai, Football ah ber mai hian tun dinhmun ah chuan țan lak kan țul zualin, a bik in infiammi ten tumruhna leh tih tak tak na thinlung pu a kan tih angai ta. Tin, Sport lam a hma kan sawn lehzual nan țhangthar lehkhathiam leh fing zawk ten he kan khua Thenzawl tan ngei hian hma lak a hun tak meuh meuh tih hi atawp khar nan ka sawi duh a, țhangthar fel tak tak te țan la turin ka sawm che u a ni.

 Ka lawm e.