KUTDAWH KHUA

KUTDAWH KHUA

Mizoramah hian khaw pakhat a awm a, khaw pangngai ve tak, khaw dang ang  bawk a 'khaw mipui zat enin Biak In an ngah mah mah awm mang e' tih tur an ni. Infiamna lamah leh show neuh neuhah an tel peih fu a, harhna in a nuai ve fo bawk. Mahse, mak takin he khua hi Kutdawh Khua an ni tlat nia mawle. Zahthlak zawkin! Kut an dawh thin dan hrang hrangte chu hetiang hi a ni :

1. An khaw infiam mi, thalaite hi Kutdawh Rilru pu deuh vek an ni. Tournament engemaw an siam dawn te, Inter Village tournament engemawa an chhuah dawnte hian an mamawh thawhchhuah tum lovin dilchhuah an tum zawk ta tlat thin a. Jersey chu sawi loh, Ball leh Mawza pakhat man takngial pawh an thawkchhuak ngai lo. Mi hausa deuh tutu te emaw an dil kual a, an MLA te chu sawi loh, an biala din tum deuh ni a an hriat deuh dek dek thlengin an dil kual vek zel. Mahse, an zak lo.

2. Mak deuhin an YMA te thlengin kutdawh rilru pu vek an ni. YMA in sound system tha an duh a, bungrua eng eng emaw an mamawh a, tunhma chuan project te siamin an inhlawh vut vut thin. Tunah chuan kutdawh rilru an pu zo ta a, MLA hnenah na taka karin a dilin an dil mai. Inhlawhna pawh an dil lo, an mamawh tak bungrua kha an dil chawt zel mai a ni. Eng pawh ti dawn se, dilchhuah tur zawngin an van ruai ruai reng mai a ni. YMA hminga tute emaw tanpui an tum pawhin mi hausa deuh hnenah kut an dawh kual leh mai bawk a... Mahse, an zak lo.

3. An khaw zirlai pawlte pawh hi kutdawh tho an ni. Programme engemaw an neih dawn apiangin MLA mai bakah din tum deuh ni a an hriat apiang an dil kual vak vak zel. Thlan tla a thawhchhuah an tum tawh miah lo. Awlsam takin cheng sing tel an khawnchhuak mai zel bawk a. Politician ho tan pek loh ngam pawh an ni lo, vote lohah, beih rawnah an vau titih zel.

4. An khaw Kohhran lian berin inkhawmpui lian an thlen dawn apiangin sorkar tanpuina te, MLA Fund te dilin kut an dawh ve ziah bawk. MLA fund hi sakhaw thila hman thiang a ni lo tih an hriat ve tho bawk si avangin midang hmingin Kohhranin an thawk mai thin. Kutdawh rilru an put miau avangin campaign-na atana politician ten eng thil emaw Kohhran an leisak thlengin an pawm duak duak zel mai a ni. Biak in chhunga awlsam taka hlan thianghlim leh mai kha an thiam riau a. Pathian ram piah lama sum khawnchhuah an thiam em em bawk.

5. An khuaah hian Pawl neuh neuh an ngah em em a, heng pawl zinga pakhatmah hi intodelh an awm miah lo, Kutdawh Pawl vek an ni. Mahse, Kutdawh tih chu an duh miah lo thung.

Hetianga kutdawh rilru pu an nih tlat avang hian MLA atan pawh mi hausa lo chu an duh miah lo a. Thawhchhuah hlut zia te, hnathawh zirtirtu turte an duh lo, an mamawh an dil apiang pe theitu tur MLA hausa, Politician hausa, an duh hun huna tawngkam chhe tleuh nan bera an hman leh theih tur ni bawk si an mamawh ber a ni. Chuvangin, eirukna atanga inti hausa te, smuggling hmanga inti hausate thlengin an khuaah hian an zalen em em mai a ni. Heti chung hian Zu erawh sualah an ngai ve tlat a, an khuaah zawrh an phal miah lo, an in tur chu a rukin khaw dang a mi an lalut zeih zeih mai a ni.

He KUTDAWH KHUA hi Mizoramah a awm tak tak a, a khaw hming erawh kan sawi kher lo mai ang. FIR te riau riau an thehlut ang e. In khua chu a ni lo turah ngai phawt mai teh.