THENZAWL KHAWTLANG CHHIATNI LEH ṬHATNI INKAIHHRUAINA DAN 2022

I. CHHIAT NI :

1. Kohhran/Corps inkhawm laia mitthi / khawhar ina zai chungchang : Biak In hnaia chhiat tawk an awm chuan Branch Y.M.A leh Kohhran/Corps hruaitute inbe rem thin se tih a ni.
2. Mitthi an awm a hmalak dan tur chungchang : Mitthi an awmin mitthi vui leh vuina hmanrua leh ṭul dangte hi Kohhran/Corps mawh-phurhna a ni a. Kuang zawn/ nawr / motor a phurh, hruizen leh thlan vur chu Y.M.A mawhphurhna a ni ang a, mitthi vui zawh hnua Mic(Au rinna) hmanzui tur leh zan lama eng chhit tur bakah a ṭul dangte chu Branch Y.M.A kut a ni ang.
3. Mitthi ruang kuang chhunga dah chungchang : Mitthi ruang kuanga dah hi Branch Y.M.A kutah dah a ni.
4. Hlamzuih chungchang : Central Y.M.A inkaihhruaina dan zuiin ni 90 (sawmkua) chin hnuailama thite chu ‘Hlamzuih’ a chhiar nise tih a ni a. Hlamzuiha thite chu thlanmualah inphum tho tur a ni a, kuang pawh Y.M.A in tum sak tur a ni. (Central Y.M.A in hlamzuih chung-changa ruahmanna thar a siam anih chuan he dan hi enṭhat leh nise tih a ni).
5. Mitthi vui hun : Mitthi vui nghal leh vui nghal loh chungchangah hun bituk mumal tak neih ṭha tih a ni a, zing dar 8:00 hma lama thite chu vui nghal tur a ni a, khualkhuaa thite leh harsatna danglam bik neite chu a ṭul angin Branch Y.M.A leh Kohhran/Corps hruaitute inbiak remna a kalpui tur a ni. Tin, lumen ngaia thite chu chhun dar 12:00-ah vui ṭhin tur a ni a, lumen ngailote chu chawhnu dar 1:00-ah vui ṭhin tur a ni.
6. Mitthi kuang chunga thlalak leh pangpar chungchang : Thlalak hi a reilo thei ang bera kalpui tur a ni a, vawi 30 (sawmthum) aia tam lo thla lak ]hin tur a ni. Thlalakna a pangpar dah hi 4 (Pali) aia tam lo tur a ni bawk. Mitthi pangpar leh puan inpek ṭhin hi a tlem thei ang bera mitthi chhungte pek ṭhin nise, pawisa a inpek hi uar deuh deuh zawk nise. Hemi chunchanga inzirtirna hi Kohhran/Corps leh Y.M.A ten bawhzui nise tih a ni. Mitthi kuang puana khuhna hi Kohhran / Corps kutah dah a ni a, kuang chei hi Branch Y.M.A kutah dah a ni. Thlalakna hmuna kuang zawnchhuah hi Branch Y.M.A leh Kohhran / Corps kutah dah a ni.
7. Mitthi lumen zan chungchang : Mitthi lumena Ṭhalaite leh nu leh pate hun chan dan hi hetiang hian siam a ni, zantir lam dar 9:00 thleng chu nu leh pate chan nise, dar 9:00 hnulam chu ṭhalaite chan ni thung se tih a ni a. Zingkarah nu leh pate a hma thei ang bera kal ṭhin tur a ni.

II. THATNI

1. Innei an awmin Biak In inkhawm zawh a nih tawh chuan mo te hi mipa in lamah luh nghal zel nise tih a ni.