Bo Zawn hi!

 Bo Zawn Chungchang

Tunhma aṭangin bo zawn hi kan lo titawh ṭhin a. Kan hnam nunphung anih miau avangin kan la tizel ngei ang.

Mite kal zat chu ka la kal hauh lo nain, vawi engemaw zat chu ka lo chhuak ve tawh a. Ngaihdan inanglo tak tak, mi hrang hrang karah chuan an lo tam bawk a. Hruaitute tan rorelna fel tak neih pawh a har hlein a rinawm a.

Mi hrang kan tam a, ngaihdan a tam avang hian rilrua tihtauh deuh sawk sawk chingte pawh an lo awm anih pawhin a awm viau a. Hruaitute tan erawh a luhaithlak ṭhin hle ang tih a rinawm.

Heti hian rawt fiamna te han nei chhin ta ila....

Hruaitu/Roreltu : Khawtinah hian kan hmahruaitute chu YMA leh kan VC lam te an ni tlangpuiin ka ring. Heng kan hruaitute hi khawtlang nu leh pate an nih avang hian an rel pawh a awm rèng a. Amaherawh-chu, han ti leh hram ila, heng kan VC leh YMA hruaitute hi kum lamah pawh la naupang ve tak tak an ni a. Ṭawng mawilo ni suh se, tuitla zawnna pakhatah chuan kan hruaitu pakhat chuan ngar hem dan takngial pawh a lo la hre biklo tlat mai a. Tin, ramchin (ramhnuai lam) la hrelo pawh tam tak an awm ngei ang.

Chuvang chuan....

Ramchin hria, rorel lam thei, upa lam deuhte, a theih phei chuan ramhnuai kalthei khawpa chak ṭha hi mahni khawchhung mi, veng hrang hrangah an awm ngei anga. Hengho te hian a zawn dan tur chungchang an rel ang.

YMA/VC :

Chung kan upa te thurel chu anni hian a kenkawh hna chu an thawk anga. A thawhchhuah dan tur leh RV hmun te, thleng hmasa tur te pawh inruat a tul chuan an inruatfel diam ang. Tin, Kawtina branch len zawng erawh a inang lemlo mah se, Branch tin hian phone signal ṭhatlohna hmun atana inringin, walkie talkie hi set 10 vel ṭheuh tal thawhchhuahpui ni ta se la.

RV-a eirawngbawl lam chungchang chu kan sawi tel lovang.

RV-ah eirawng bawllo hmun ṭhu awmin, mipui, a phuk a phak hrelo te chu team hrang hranga siamin, team leader feltak hruaina hnuaiah walkie talkie nen, "Chumi bial bik," an zawnna tur ah chuan thawnliam zung zung sela. A lo remchang viau anih pawhin, an bial chan bak chu anni team te chuan khawih miahlo se. 

Roreltu, Hruaitu, Team leader te kan ngai niin a lang ta. 

Mipui lam: 

Mahni ngaihdan a kal tum tlat, hruaitute thusawi pawm hleitheilo kan awm ṭhin hian hma lak a tihar ṭhin. Rotekawla-sepa ang deuh va mahni ngaihdan chauh ṭha ni a hre tlat kan awm hian, hruaitute an hah lehzual ṭhin.

Tak-a-na,

Mi bo zawn hun chhung hi - A bo aṭanga ni 7 chhung nge, khawtlangin kan zawn ṭan aṭanga ni 7 chhung zawk le? Nia i hriat kha a hnuaia comment-na lamah khuan aw...