Pu Lalduhoma ka hmuh dan

~Lallura

(Ka hmuhdan a ni mai a, in hnialnan ka ziaklo a nia)

Pu Lalduhawma hi, Political party aluh atanga vawiin ni thleng hian, sawichhiatna chi hrang hrang chhiar tur atam ta hle, zuanglawr tih te, tui ru a phuhna te etc. Heng hi chu belhchian dawl lo, party dangin an sawichhiatna mai niin a lang.

A lehlam side ah chuan, Kohhran upa a ni a, Pathian thu, pulpit tlang atang pawha ngaihnawm leh piantharna khawp a mite hrilhfiah thei, mi nawilo tak a ni tih a hmuh theih a. Tin, a mihring mihrinna ah pawh mi taima, kut hnathawh hrehlo mi, midangte bantu nih aia midangte tanpui thintu niin a lang bawk.  Tin, eirukna lamah pawh, fihlim ngam leh mite entawn tlak a ding ngam niin a lang leh bawk.

Prime Minister te thlenga lo escort a, hnaih chilhtu Mizopa, India dan leh dun pawh hre tawk, mi inzir mi tak, leh thil rin thu mai mai sawilo tura zir chiang zel mi, fiah taka mite hrilhfiah thlap thei khawp a, tawn hriat, zirchiang thin a ni tih Assambly sessionah leh a thu sawina reng rengah kan hmu thin a. A politician puite huathlawh khawp a dikna duhtu leh, thudik sawitu leh tlangzarh thintu a nih avangin, Zoram tan a tha turah hlauh a neilo a, siamthat theihloh ni a ahriat chu chhuahsan hmiah ngam a ni  tih pawh chhut chiang duh chuan an chiang hle awm e. 

Kalphung thalo puangzar zel ngam a nih avangin, a MLA puite pawhin an han khengbet ve leh lawp lawp thin, mahse Pathian leh a mah thlangtlingtu te bawkin an kai tho a, Mizoram Assembly hall opposition seatah an rawn hung lut leh a, khengbettu te nen thu ho lehin, ngaihdamna thu, an zavai a hma a puang chhuak leh ta piap a nih kha (a puitlinthlak khawp ma).

Mizo fate zingah hian, Politic retheih pui ngam kan awm a nih chuan, Pu Lalduhawma te ang hi an nih hmel e.

Mitam tak, officer lian tak tak, an service atanga retire hnu a Politic a lut kan hre fo. Mahse, Zoram siam that tak tak duh avanga hna bansan a Politica zuang lut chu, amah, Pu Lalduhawma ngei hi a ni. A dangte hi chu, awm mai mai ai a, mi langsar nih zel duhna avanga Political party a zuang lut an ni berin a lang. An han MLA/Ministera a, CM nuih rual a nui ve leh mai te an ni awm e. Ram tan a tha tur leh thil tha tih tum an awm ve tak tak lo niin a lang.

A ni Pu Lalduhawma erawh hi chu, a chuanna motorin a kal tumna hawi zawng a kalpui a tumlo ni a a hriat chuan, chhuk a motor dang a chuang leh mai thin a nih avangin 'zuanglawr' ti a sawi chhe/nuih zat tu pawh an awm reng a. Mi khalha a chuan chuan, a kal tumna engtikah mah a thleng dawnlo tih in hria-in, a mah ngeiin  motor  han lei a, (party a han din ve thin a) a chhunga lo chuang ve te nen, thlen tumna alo inanglo leh si thin a, a mah zawkin kawngdang a dap leh a ngai thin. A khawtlai chuan, emaw, a chawlhsan mai chuan, a thlen tumna ram chu, kal hmasa zawk ten, khai chhuah leh harsa khawpin, (Zoram) anlo sawp chhe hman tak ngial dawn si. A la bei ta fat fat a nih hi.  

Chu chu tunah Zoram mipuiten kan hrethiam chho ve tan ta a, a lawmawm khawp mai. 

Sap thufingin, "Mi A chu lalthuthlenga a thut chiahin a Fin leh At a lang thin" anlo ti a. Kum 35 chhunga kan CM pahnih hrawn tawh te ah hian – ram hmangaih tak tak tu an awmlo a, zui zel tlak an awmlo tih chu, amah Pu Lalduhawma, an mahni lo bel chiang tawhtu leh hre chiang em em tu, a mah ngeiin, chemfawng vawn a tul em em na hria-in, a fawng vawn a tum ta ngar ngar a nih hi.  

Mipui mit erawh a del rei deuh a, vanneihthlak takin "DEL" hlen  lovin, ram hruaitute chezia, kalphung  leh kamchhuak in min dengharh ve ta zel a, dikna duhtu leh, Zoram hmangaiha, siamthat duhtu te anlo tho chhuak ta tiam tiam a nih hi.

 

Politic a a zuan luh hlim 1985 chho atang khan Public hma a a thusawi te, Pulpit tlanga a thusawi te, campaign a thusawi te, ka mitin ka lo hmu ve a, ka bengin alo ngaithla ve tawh thin a, tin a thu ziak tamtak ka lo chhiar ve tawh bawk thin. Chutih rual rualin a amah hnawksak ti pawl, a CM ve mai ang tih hlau pawl, thu leh hla hmuh tur a awm ve zel bawk a. 

Sap thufing in, "First deserve, then desire" an ti thin a, MNF lam te pawh, ram hmangaih avangin an ram mu a, Zoram tana ram mu ve ta chu, ram hmangaih bertu tura ngaiin, ramhnuai ata anlo chhuah veleh rorelna chu, mipuite pawhin zah takin, an kutah kan han hlan ta a nih kha.

 Dan pawn atangin Indian Constitution (Dan huang) chhungah anlo lut ta a, harsatna reng reng India dan hnuaiah, keuh luh a ni a. Chu chu khawvel kalhmang a ni, India dan pui chhungah erawn chuan, independence min champion  puilo and bawkin, state chawikang turin, ei leh bar, kawng leh kawlphetha ah te min survive puilo a, an fit lo va, dawtin in Mizoram an kai hruai a, dawtsawi lamah chuan an fit hle thung a, ram in a sawtpui silo.

British naturalist Charles Darwina'n 1869 a lehkhabu, a publish-a, a lo sawi ang in, "Survival of the fittest" a ni si a. 

A diktak chuan kan ram thil dehchhuah leh intodelh lohzia han thlirin Independence hmuhte pawh kan fit-lo a, kan deserve lo a ni. Lo independence ta pawh ni teh reng ila…kan kalphung tur chhut thiam a harsa hle.

Tichuan, State sorkarna steering vuantu te hnuai ah, Mizoram chuan kum 35 hmel a hmu chho ta a, mahse, kum 35 a liam tawh hnuah pawh, Silchar kawng bak, chakkhai lakluhna kawngpui tha kan nei lova, State thenawm te ban ngailo turin kan intodelh bawk hek lo. Central lama lal apiang, Hindu an ni emaw, nilo emaw, kutdawh ang maiin, an nuih ruala nuih a ngai a, min chhandamtu Lal Isua sirah dahin, an sakhua kan biakpui lo chauh a ni ta mai zel a. Ram hruai tha (super state a min hlangkai) tur chuan an fitlo a, an thahnem ngaihna hian an deserve lo a ni.

Kan intodelh loh em avangin, Assam hian min zuam ta hle a, an remna lai laiah min rawn nek ta mai chu a ni. Zofate (son of the soil) huan leh lo-ramah te lo lut in, huan thlai te an suat a, mel lungphun te an tichhia a. Zofate dawta puhin an man thul, Mizoram chhungah an rawn sawisa thul, an mobile te an laksak thul…milu la hnam kan ni ti a, kan pawr ang hu-in, economic blockade hlau reng rengin kan sorkar "mipuite thlavang hauh tura beisei" a kimki a, mipuite bawkin hma an hruai leh thin a nih hi. 

Hmanlai kan pi leh pute kha an hausa hauhlo, mahse buh leh bal ah tumah an awt lo a, rukru te, mi thatchhiate tan khawiah mah hmun a awmlo. Chhungkawtin in, rualbanloh, intodelh loh an hlau a, an thawk rim a, hlim a hunah khawtlang pumpui an hlim thin. Tumah an awt lova, tuma neih eilo na na na chuan, tumah an hlau biklo ani. Mirethei ber tan pawh khawtlang kha an thlamuanpui awm thin. Buhthar tam bik te chu awm mahse, kutke nei, chaw no khat ei theuh theuh, piansualna nei lemlo te zingah, hausa bik leh rethei bik an awmlo a. 

Vairengte mipui te, Kan SP leh DC thenkhat te, kan Police/IR te pawh an dawih hauh lo, mahse, pawnlam zarzo mamawh 'hotu' nei, transfer theih, suspend theih an nih miau avangin, tuboh leh dolung inkarah thumum an nei thei lo a ni. A awm zia chu, kan sorkar hrawn tawh, hruaitu te zingah, State dang hruaitu te nen a debate han nei turin kan fit lo a, Union minister te han herhkawi thei kan awmlo a, kan in chuan ve na ber, "Jungle se ai a" ho kha India danpui chhungah min hnuk lut tawh si a. Nunna tamtak senga kan sual chhuah ve trawk, State pakhat, rorelna "Steering" vuan tur chuan Jungle lam experience kha a hmanlai zo ta si a. Thangthar mi thiam,  Arakan jungle mai ni lo, rampawn lam a mi hawizau, USA, Japan, Europe, Autralia, Israel, Singapore, Korea thlenga mi hawiharh tak tak te, sorkar mi pawimawh, India kutke lo ni ve tura lo survived tawh IPS, IAS retired, State dangte nen a inbauh/inngur nikhuaah pawh India dan leh dun hrechiang, nekna ve deuh tur hi te kutah Steering hi hlan phal ila..kan zia awm hma na ber tur a ni ang. 

Party han din ve thin mahse, sorkarna chang tur chuan, midik leh mi thatak, ram hmangaihtu leh diktaka kal duhtu te mi tlemte bak 'thlawptu tha' a ngah tawk thin silo a. Zoram siamtha turin ke a pen laklawh tawh a, siamthat ngei pawh a duh a, intodelhtur hawi zawng a hmalak leh Zoram that dan tur ruangam a hmu kiau si a, 

Chumi ti thei tur chuan, "Chemfawng a vawn" a ngai si a, Opposition lam atang chuan sorkar khalh ngil turin a tha leh zung thawhin, thudik zawk phawrh thin mahse, RULING lam in an power (majority) hmangin an dah offside mai thin si a. 

A thiltawn leh paltlang tawh atangin a inzir zel a, a thusawi atang reng rengin, mi in zirmi, thil chhinchhiah thei leh, rilru fim, thu belhchian dawl leh dawt phuahchawp ve mai mailo a nihna alang. A experienced tamtak te bakah India ram dan leh dun, constitution article pawimawh lai te hre ve kilh kelh, hnial khan pawh, tanfung mumal nei a – khingpuite hnialthla thak thei a "debater" tha chunchuang a ni.

Kohhran upa a nihna zawnah pawh, Pathian thulam hretak, a theih chen chen nupuitu, leh Evangelist Team speaker atan a itawm khawp a ni. A thiltihna kawng reng rengah, hlawhtling tlak a tumruh, taima leh mi insum thei, tu te emaw ai a, Pathian tih mi, Pathian leh kan ram tan a, a tak ding ngam – thil thalo lam chu thlah/tilhsan zel ngam (tel ve lo ngam) a ni.

Zoram in hetiang mi thiam, thluak fim, tum ruh, Zoram thatna torah chuan beidawng lova thudik phawrh ngam, mi huaisen, mi taima kan nei hi a vanneih thlak hle. vawikhat na na chu Chief Minister nih hi chu a phu (deserve) ve a ni.

Kum 2023 inthlan puiah hi chuan, Mizoram in ke chheh thar a ke kan pen theih tawhnan Chief Minister nghawngkawl hi Pu Lalduhawma ko ah hian bahtir chhin ve ila, CM nghawngkawl a bah ngei theihnan a mah leh mipui tan a ding ngam tur, Constituency tin a candidates theuh te hi hnathawh kawr i hak tir ve chhin ila maw le.

Kum 35 minlo hruaitu te hian khawinge min thlen pui tawh le ? Heng minlo hruai tawhtu te hi lo belchiang tawh, Zoram hi ram ropuiah min thlen dawnlo tih hria in, amah ngeiin Zoram steering vawn ve a duh a ni a, vawikhat na reng reng chu Mizo mipuite hian  Steering han vawn tir ve ang u hmiang.