Kan Politics (khelhdan) hi....

(A field-a cheng ve ta lo chu, kan thilhriat pawh a ril lemlo khawp mai a. Mahse pawnlam aṭang hian sawi han neih ve reng reng ka duh e. Tu huatthu a ni lawng chu maw..)

Politics hi chu a thianghlim lohna em em pawh a awm chuang lo va. Kohhran a a-kul-a-tai-a inhmang tan pawh a mawi lohna em em a awmin a hriat loh. Chutih rualin, a khelha kheltute khelhdan erawh hi chu ngaihtuah tham fe niin a lang.

• Midang sawisel : Kan khelhdan a mawilo tak pakhat chu midang sel kan ching hi ava han ni tak êm! Kan ṭhatna avanga tlin ai chuan, midang ṭhatlohna azara tlin ve hram kan inbeisei zawk emaw ni chu aw!! Mi ropui, Abraham Lincoln-a te leh midang te campaign dan kan hria; keimahni tan enge a rem ve lohna tur awm ang le!
• Kan bial tan a ṭha ang : Kristiante tih atana mawi pawh a ni lo em aw! A tlukpui dang han sawi ta ila - 'Kan chhungkaw tan hemi hi a ṭha ang,'  'Kan khaw tan a ṭha ang,' 'Kan bial (constituency) tan a ṭha ang' etc... Heng thute hi ram hmasawnna aiin pamham zia a ni zawkin a lang. Hmasawnna duhtu chuan rampum huapin thlir zawk se a ṭha tur.
• Hmasawnna kan hmu ang: Hmasawnna tih hi kan huamchin a inanglo thei viau mai thei. Pa pakhat chuan i  a sa a, a sak hma aiin hma a sawn; Pakhat leh chuan inchhung bungrua a neih belh thur thur a, hma a sawn; Pakhat leh chuan a faten lei rem an rah theihnan a dinhmun a sawhnghet sauh sauh a, hma a sawn. Hengte hian kawng hrang hrangin hma an sawn ngei mai.

Tin, kan ram dinhmun en hian, kawngpui ṭha neih ringawt pawh hi kan mamawh ber niin a lang lo.
Kan bial hi hmasawn hle ila, (engti kawnga hmasawn ber nge niang! Kawng ṭha, phullem phah etc te hi hmasawnna kan tehna a ni em aw!) Bial/khaw dang te hian hma sawn ve lo ta se, kan hmasawnna chu a khingbai ngei ang tir'u! 

Mamawh tam tak kan nei a, kan mamawh tam tak zinga pakhat, a ber ni kumkhua tur chu rorelna ṭha leh dik a ni ngei mai. 

1. Sawrkar hnathawk ni si, an post a awmtir theih miahloh te;

2.  Mahni office aia mahni clinic ngaipawimawh zawk te;

3. GP han withdraw dawn a, lak tumzat atanga chumi % sen phawt hnua withdraw theih chauh te etc... sawisen a ni lovang.

Heng zawng zawng han ngaihtuah hian kawngpui ṭha te han nei ringawt ila, corruption a bân phah siloh chuan kan ram ringte hian hnungtawlh zawngin hma a sawn chho zel ngei ang.

Kan han campaign a, inthlan dawn ṭepah. Campaign-na hun ṭhaber chu rorelna kan chan tirh aṭang khan a inṭan daih tawh a. Insawi mâm na hun ah kan hmang a ni ta ber mai. Rorellai tan chuan campaign hi insengso chiama tih atan chuan thil ṭullo tak niin a ngaih theih. Kum 5 chhunga kan hnathawh kha kan campaign na niin ngai thei ila chuan kan ram hian hma a sawn hlein a rinawm.

 Sawi zawm ve r'u...