Dahbo Suh U

Article :

DAHBO SUH U

R. Lalfakzual, Seling

 MLA inthlan result kan hre leh ta a, sawrkhar thar, mipui sawrkhar nei turin kan inbuatsaih ta tak tak a. Beiseina thar nen, thlirna thar nen kan vil tawh dawn avangin term dang zawng zawng aiin kan sawrkhar tharah hian mipuiten beiseina kan nei sang dawn a, kan tehna pawh a sang tawh dawn a ni.

India hmarchhak kila awm e ti lo hian kan thil thlirna hi a sangin a changkang khawp a. Inthlan campaign hma aṭang tawhin khawvel sawrkhar ropui zawk USA, England etc. rorel dan leh an inkaihhruaina entawntlak kan tihte kan sawiin kan hre zel zul tawh. Kan sawrkhar thar hian Switzerland of the East min tiam mah suh se; an tum dan leh ruahman dan an sawi ṭhin anga an kal phawt chuan sawrkhar ṭha tak, rorelna dik leh eiruk awm lohna hmun; khi-ah khi-ah kan awm dawn tih chiang reng mai.

Term hnih sawrkhar hnua inchhawk ṭhin kha term khat chauhva hruaitu kan han thlak ta mai hi eng vang nge? tih sawi tur tam tak a awm laiin, ṭhenkhat tan chuan hriat thiam a har ve tho ang. MNF sawrkhar kalta khan kum 5 chhung khan hna tam tak an thawk a, anmahni’n sawi dawn ni se, hahipa sawi tur an nei ngei ang le.

An sawrkhar veleh Congress sawrkhar hmasaa mipui vei rawn kawng chhia kha an rawn siam nghal pup pup a; traffic jam tihreh nana Bawngkawn-a kawng chhung siam dan tur an kawk kual lai te; parking atana PAHOSS (Parking House Support Scheme) nena Aizawl kawngpui zauh tawh dan turte kan mitthla chho nghal a nih kha.

Infiamna lamah ni se, Covid hripui karah pawh mamawh aia tam phullem kan phah ta emaw tih turin mipuiten kan phunpui hial zawk a. Thingtlang khaw kilkhawr zawk thlengin kan phah zui zui a; ‘Khelmual ṭha’ tia kan auna a la rei loh nen, kan han neih tak tak chuan kan duh leh ta lo emaw tih tur hialin kan sawi hnawm thiam leh si a.

Khawpui mite infiamna tur Racing Track lah ni se, sum tam tak sengin hma lak mawlh mawlh a ni a, rei lo teah an peih thuai ang. Sport minister hmalakna ni lo mah se a tana hmingṭhatna hun remchang Remsiami, Jeremy tih ten an rawn siamsak a. Sport minister chak tak kan nei tih phat rual a ni lo.

Pu Ṭhena kaltlanga sawi lo theih loh ‘six basic needs’ kha MNF sawrkharah hian kan hnianghnar khat viau chuan a hriat a. Kan phun tamna ber ṭhin buhfai leh gas lamah pawh MNF sawrkhar kha sawiselna tur awm lo khawpin Minister ṭha kan nei; mahse a tling zo lo ta tho mai si.

Power & Electricity lamah ni se, hun hmasa lam ai chuan kan nei ṭha thlawt a, keini ang khuaah ngei ngei pawh power supply a khaihlak changin kan hre thiam lo zawk hial emaw tih tur a ni. Mahse, heti chung pawhin a changtupa kan thlang tling zo ta chuang bik lo va.

Mipui hriselna vawn kawngah ni se, hmun tam takah Damdawiin, CHC leh PHC thlengin tihchangtlun a ni a. Thingtlang kilkhawr zawkah pawh kan la hriat ngai loh Health & Wellness Centre neiin thawktu thar neiin mipui tan chuan a vanneihthlak khawp mai. Kan Minister khan hmasawnna rahbi thar min kaipuite sawi dawn se sawi tur a ngah ang, mahse, a ni; MNF-ten an rawng ser huai berte zinga mi pawh a tling zo ta chuang lo.

Chief Minister kan neih tawh zawng zawnga zopa ber, pa fel leh biak nuam kan tih rawn pawh a tling zo ta lo. A bial chhunga hna a thawh dan en leh a khingpuite ena tling ngei tura opposition-te pawhin an lo rinrùk kha a tling zo bik lo tlat; eng nge a chhan ni ang? A chhanna dik chu mipui rilruah a awm rualin tlangkam titi hi sawi a chakawm ve tlat.

ZPM hi an Ṭha bik em ni?

An ṭhat bikna sawi turin vawi khat pawh sawrkharna an la siam lo va, heti chung hian seat 27 zet (an ring pha bikin ka ring chiah lo) changin hneh takin sawrkharna an siam thei a, eng vang nge? An MLA te kha an fel bik vek lohzia leh sawi anga an awm bik lohzia chu MLA hlawh pung leh Car thar chungchangah khan kan hre vek a; mahse anni chuan heti chung chung pawh hian an bial an vawnghim thei tlat lawi si!

Hotu/hruaitu bawra an buai ve zia kha opposition-te titi tui ber a ni a, working chairman leh Chief Ministerial candidate inkara khi thuk tak awm anga sawite kha tak tak a lo ni lo nge? heti hi an ni thei mai a.

A party kalphung angin en ta ila, mi tam takte sawiselna – ze nghet nei lo, unit kan din lo vang an tih pawha din leh mai kha an ni ve a, mahse an tling tlat lawi si. An tlin chhan pawh hi a chhanna chu mipui rilruah a thuhmun kher lo vang; mahse, ZPM-in hneh taka sawrkharna an chan theih chhan ni awma mi sawi hi ngaihnawm tak zawng a ni.

1. A thli a tleh miau va, dan theih a ni lo. Mi ṭhenkhat chuan candidate ṭhat leh ṭhat loh lam pawh an thlu lo va, ZPM candidate a nih chuan vote an chàk tlat kha an tlin chhan lian tak pakhat a ni. Politics boruak nut laia ‘vawkpui pawh ni se ka vote ang’ tih rilru kan sawi ṭhin ang deuh khan, ZPM candidate kha mi tam tak chuan an vote chak tlat nia.
2. Sawrkhar kaltaa pu ber leh minister pakhat inhne hnai fal bik lutuk kha mi tam tak chuan an helh a. Kha minister kha fel leh ṭha an tih ber a nih si loh avangin an pahniha chungah rinna nghat ngam lovin mi ṭhenkhat chu an tui loh phah hial a ni. Inti hre deuh leh inti thlir thui deuh chuan MNF hi sawrkhar leh ngat se chu party vaw pheltu turah an lo ngai hial a nia!
3. Kamrula hi tu nge tih hriat si lohah chuan MNF hmai tibaltu lian berte zinga mi niah an ngai a, party worker tam zawk chuan hmai phih faina khawp an sawifiah zo lo.
4. Covid hripui vanga kan harsatna tawh hrang hrang kha zep rual a ni lo. Mahse, kan sawrkhar hmasa khan chhuanlamah a hmang rei ta lutuk a, kha kha a chhan lian tak pakhat a ni. Sum pai enkawl thiam loh chhuanlam dang hre si lovin Covid kha chhuanlamah an hmang niin mi tam tak chuan an ngaih phah hial reng a ni.
5. ZPM hi political party zinga social media thahrui hmang thiam ber an ni. A tir lamah khan an ân a chhiain ṭawngkam duhtui lo hle mah se, inthlan dawn hnaihah khan “Krista ringtute chu…” tih hla an sak ṭhin ang rilru kha an pu ta deuh nge, mipui thinhrik khawpin ṭawngkam an cheh leh duh miah si lo te khan neutral beng thlep deuh tawhte kha a hip ve tlat.
6. Ṭhalai zingah ZPM a tlak nat chu thuhran ni se, nu leh pa zingah pawh ‘MNF ni lo, congress ni lo’ tih rilru a tlak len em avangin term 2 pawh kan nghak chhuak zo ta lo a ni.

Sawi vek sen a nih loh avangin duhtawk dawn ila. Sawrkhar thar kan neih aṭanga mipui rilru lang chiang tak mai chu, ‘thil ṭha kan duh, tih tak tak kan duh’ tih hi a ni. ZPM hian an sawi anga ‘2028 MLA inthlan hunah chuan kan thiltih aṭangin min buk tawh dawn nia’ an tih ang ngei hi mipui thlirna tur a ni a, an lakah beiseina sang tak kan nei a ni ti chungin duhsakna ka hlan e.