Republic Day 2025

 India-in ama puala danpui a neih tan ni champha, Republic Day vawi 76-na chu Pathianni khan ram pumah lawm a ni a, a lawmna pui ber chu Delhi-a Kartavya Path-ah zingah sipai kalrem lâm nen neih a ni.

Prime Minister Narendra Modi chuan sipai kalrem lâm tan hmain sipai chi thuma a hotu lu berte nen National War Memorial-ah zahna pangpar an dah a. President Droupadi Murmu-i chu Kartavya Path-ah hian khual lian atana sawm, Indonesian President Prabowo Subianto nen an thleng a, vengtu thahnem tak nen inkhawm hi hman a ni.

Khual lian leh president-in lawmna hmun an thlen hnu lawkah hian tableaux 31 chuan Kartavya Path an zawh tan a, kumina tableaux kawng zawh hi ‘Swarnim Bharat: Virasat aur Vikas’ tih thupui hmanga neih a ni.

Tableaux hmasaah hian sipai chi thumten thawhna hrang hrang leh ram venhimna kawngah an tan do dan te, an beih dante pho lan a ni.

Kumin Republic Day lawmnaah hian mikhual 10,000 vel sawm an ni a, sorkarin ram dan pawimawhna a kalpui mek, ‘Jan Bhagidari’ an tih angin ram chhunga langsar tak ni lem lova hma la nasate pawh sawm an ni.

Kalrem lâm neih chhung hian ram chhung hmun hrang hrang atanga chah khawm rimawi tumna hmanrua hmangin ‘Sare Jahan Se Achha’ tih hla tum niin cultural artiste 300 rual an zai a. Rimawi tum nan hian shehnai, sundari, nadaswaram, been, mashak been, ransingha – Rajasthan, flute, karadi majalu, mohuri, sankha, tutari, dhol, gong, nishan, chang, tasha, sambal, chenda, idakka, lezim, thavil, gudum baza, talam leh monbah te pawh hman a ni.

Member 152 awmna, Indonesian National Armed Forces pawh kalrem lâmah hian an tel a, anni bakah hian Indonesia atang vek hian Military Academy-a zirlai 190 chuan rimawi an tum bawk.

Sipai contingent hmasa ber hi Lt Ahaan Kumar-a kaihhruai 61 Cavalry-in an tan a. Kum 1953-a din 61 Cavalry hi khawvela Horsed Cavalry Regiment awm chhun a ni tawh.

Sipai hmanrua chi hrang pho chhuah a ni bawk a, heng zingah hian T-90 (Bhishma) tank, NAG missile system bakah BMP-2 Sarath, BrahMos cruise missile, Pinaka multi-launcher rocket system, Akash weapon system, light specialist vehicle (Bajrang) leh vehicle mounted infantry mortar system (Airawat) te pawh a tel.

Sipai chi thumte chuan an tableaux pho chhuahah hian ‘Shashakt aur Surakshit Bharat’ tih thupui an hmang a, an pathum inkara inpawhna leh inbiakpawhna tha an neihzia an tilang a. Khawmual, tuipui leh boruakah Arjun main battle tank, Tejas MKII fighter aircraft, Advanced Light Helicopter, destroyer INS Visakhapatnam leh remotely piloted aircraft an inhmantawm vek tih pawh an pho lang.

Veterans’ tableaux chuan ‘Viksit Bharat ki Ore Sadaiv Agrasar’ tih thupuia hmangin inthununna, inpekna leh taimakna lama mi hmasa zawkte chet thatna an pho lang a. Hetah hian infiamnaa India chawimawitute pawh pho lan niin Padma Shri lo dawng tawh, Subedar Murlikant Petkar pawh a tel a. Ani hi a chanchin chu Bollywood film Chandu Champion-ah siam hial a ni a, Honorary Captain Jitu Rai pawh pho lan a ni.

Sipai chi thum atangin hmeichhe officer pathum – Lieutenant Colonel Ravinderjeet Randhawa, Lieutenant Commander Mani Agarwal leh Flight Lieutenant Ruchi Saha te chuan ‘nari shakti’ (women power) an pho chhuak a, sipaia hmeichhiate tel ve theih dan an tilang.

Kartavya Path-a kalrem lâma tel zingah hian hmeichhe hlang 148 awmna, Central Reserve Police Force (CRPF) pawh telin Assistant Commandant Aishwarya Joy M-i’n a kaihruai.

Republic Day lawmna hi Beating Retreat-a khar thin a ni a, January 29 hian Vijay Chowk-ah neih thin a ni a . He thil hi sipai tih dan thin, kum za chuang kal tawh atanga tih thin niin indona hmunah ni a tlak ruala sipaiten an ralthuamte tunga an camp lam an pan dawn tih hriattir nana ‘retreat’ an tih kal zel a ni.

Beating Retreat ceremony 2025-ah hian Indian hla chauh tum a ni dawn nghe nghe a ni.