Feli Fanai a liam ta!!

ZALEN, Feb. 12, 2024: Zo rimawi khawvel fanu hrin ropui ber zinga mi, Feli Fanai tia hriat lar, Lalnunfeli Fanai chu Nilaini zing dar 2:15 khan a thi. Kum 32 mi a ni.

Feli Fanai hi Ebenezar Hospital-ah a thi a. Natna neuh neuh nei niin, damdawi in a awm chhung hian a hun tam zawk chu ICU-ah enkawl a ni.

Lengzem khawvelin a hriat reng tawh tur Feli Fanai hi December 20, 2024 khan a taksa a chauh zual deuh avangin Aizawl Hospital panpui a ni a, damdawi in panpui a nih hian ICU lamah enkawl tura dah luh nghal a ni.

Aizawl Hospital-ah theihtawp chhuah enkawl a nih hnuah, hma a sawn chak hleih theih loh avangin beiseina sang tak nen January 6, 2025 tlai dar 5 khan Ebenezar Hospital-ah phurh thlak a ni a. ICU luhpui nghal a ni a. Hemi hnu hian damin Hospital hi a chhuahsan leh tawh lo!

Lengzem arsi lian - Feli Fanai ruang hi, Ramhlun North Industry Mual-a a pute inah chawlhpui a nih hnuah, ambulance hmangin Champhai panpui a ni ang.

Naupang tê niin Zo rimawi khawvelah 'Min Hlan Leh La' music video hmangin a zuang lut a. Heta tang hian a hawi kir leh tawh lo a, thuk zawka rimawi tuipuia a inhnimphum chhoh zel hnuah, November 19, 2013 khan a studio album hmasa ber, mi hrang hrang hla phuah 10 awmna — Fam Khawlawi — album chu Chanmari YMA Hall-ah a tlangzarh a. He an album hi a hringtu, a pa thih champhaphakah chiah, a pa hriatreng nan a tlangzarh nghe nghe.

A debut album a tihchhuah atanga kum sarih hnuah, an album pahnihna leh a hnuhnung ber tur ni ta chu January 30, 2020 khan a tichhuak leh. A album title pawh — Tuma'n An Tluk Lo — tih a ni. He album-ah hian tracklist 13 a awm a. He album erawh digital platform kaltlanga tihchhuah niin, Apple Music-ah te a dah thung.

He a album-ah hian a single hit ber ber — album title 'Tuma'n An Tluk Lo' bakah, 'Pheichhehmawi I Khai Ang Aw' tihte, 'Lengdang Tang A Bel' tihte; Michelle Varte leh Zaii Hauchhum te nena an siam 'Ka Tan I Mawi' tihte a dah bakah, a debut studio album-a a hla pahnih — Then Che Ka Hlau leh Min Hlan Leh La — tihte pawh a dah tel leh nghe nghe.

Tey T-max pawhin heti hian a sawi

Ṭhiannu Feli Fanai, i chanchin chuan min va ṭhâwng ve aw, a pawi tih mai loh chu sawi ngaihna ka hrelo. I chanchin, hmana min hrilh ho kha ziakin ka la vawng ṭha reng asin. Hmeichhe hlim thei tak i ni ve ṭhin asin le. Eng anga harsatna pawh lo hmachhawn se, awkâ hlim leh zângkhai vâha Tupawh alo hmachhawn zêl thei hi fakawm ka ti. Nuih duh ve tak, zângkhai vah, ṭawngduh ve tak niin ka hre ṭhin.

A pawiin ka ui takzet che, lo damṭha leh vat la ka duh asin aw.

Engpawhnise i chanchin hmana min lo hrilh ṭhin kha ziakin ka lo la vawng ṭha reng a, he i chanchin leh i thlalak te hian ka wall hi han mawi ve teh se

FELI FANAI

            - Tey tmax

Hun chep tak karah kan sawmna leh ngenna min tih hlawhtlinsak avangin a chungah lawmthu ka sawi mawlh mawlh e.

A hming pum tak chu Lalnunfeli niin, apa F. Lalbiakmawia (Late) leh anu pi Thantluangi te inkarah an fa pali zinga upa ber niturin September 8, 1991 khan Champhai ah alo piang a. Unau mipa 2 leh hmeichhia 2 niin an unau zinga upa ber a ni. Feli hi rual kawm thiam tak leh a hming ang bawka fel a ni a, zirna lamah school hrang hrang ah a kal lawr ve nasa hle a. Zai lamah nise, ani pawh naupangte a nihlai aṭanga zaia inhmang chho tawh niin, biakin velah te pawh a zai ve nasa ṭhin hle. Amah hi Presbyterian kohhran a lâwi a ni nghe nghe. Zai a tui a, mahnia inzir mi tak a nihzia chu hei tunah a takin a rawn langchhuak a, hlawhtlinna kawng a rawn zawh mek a ni a. A kum naupan ngaihtuahin a hma hun a ngaihtuahawmloh hle mai. 

Zai lama a inhman avangin hun engemaw tichen chu zirna lam pawh chhunzawm theilo in a han chawlhsan ve vang vang a, tunah zirna lamah kal ṭha lehin, Open ah class 12 a zir mek a ni. 

A fakawm hle mai. Hlawhtling turin a bei a, biakinah a zai thin mai bakah radio ah te hla te a record ve a. Apa hian a tuipuiin, kawng engkimah a backup tha hle.

A hla record hmasak ber chu 'Aw zan thianghlim' tih leh 'Noel' tih hla kha a ni. Hetihlai pawh hian naupangte ala ni a, kha hla a record hmasakber kha 2003 khan a ni. 

A huatzawng chu 'Ṭhianṭha anga lang, mahse mi sawichhiat ching, lehlam a mi er ran te hi' an ni. A duhdana thil akal loh hian a rilru a hnual phah ve fo ṭhin a. Milar an ni a, Feli pawh er rana a chanchin nilo zawnga thehdarh chiam an awm ang tih chu hriatsa, heng a chanchin nilo zawnga an sawi te hian a rilru ana ngawih ngawih ṭhin. 

Zaithiam ah chuan Country Singer lar Shania Twain hi a ngaisang hle.

Feli pawh mihring ve tho a ni a, hlawhtlinna kawng zawh mek mahse vanduaina chuan a chungah thla a zar ve tho. Siamtu remruat tuma'n kan dang thei silova.

Vanduaithlak takin apa amah hmangaih em emtu leh kawng engkima kaihruai ṭhintu chuan Septisemia vangin nikum hmasa November 19, 2023 khan chatuan ram alo pansan ta.

Feli pawh hian a tuarna ve hle a, harsatna tamtak paltlangin tumruhna nasa tak a nei a. Zai a ngainatna leh a talent neih ṭha tak te chu upbo pui lovin hmalam panin a bei zel a, hlawhtling tur chuan beih hmasak angai thin tih chu Feli atang pawh hian kan hre theuh awm e.

A pa duhtak, chatuan ram panta pualin hla te pawh alo siam a, apa thih cham vek hian Pathian khawngaihna zarah nikum Nov. 19 khan alo puitlin thei ta a ni. 

Hlawhtlinna kawng zawhin programe a nei full chho char char a, malsawmna dawng turin a thawhrimna rah a seng mek a ni.

(tey t-max)