HEALTH CARE SCHEME THA KALPUI DAWN

 PRESS RELEASE

ZPM GENERAL HEADQUARTERS

Aizawl; Mizoram

KUMIN APRIL THLA ATANGIN HEALTH CARE SCHEME THA MI KAN KALPUI DAWN

- Lalrinpuii, Minister

Dated Aizawl 24th March, 2025:  Health Minister Pi Lalrinpuii chuan vawiin thawhtannia ZPM Party chhung inkhawmah, “Kan policy-a kan dah angin Rs.5,00,000/- thleng bill theihna tur Health Care Scheme ṭha mi, pawisa pek chawp ngai lo (Cashless) ni bawk Mizoram Universal Health Care Scheme chu kum khat zet kan buaipui hnuah kan lo tipuitling thei dawn ta hi a lawmawmin a ropui takzet a, sawrkar kum thar (1st April 2025) atangin kan hmang tan dawn,” a ti.

Health Minister Pi Rinpuii chuan, “Health Care Scheme hluiah chuan BPL kan tih Golden Card hmang thinte leh sawrkar hnathawkte a hranga awmin he scheme thar hnuaiah hi chuan tlema khawsak harsa deuh ABPMJAY huanga awm leh sawrkar hnathawkte huang khatah a awm vek tawh dawn a ni. A hrana registration tih thar a ngai dawn lova, data awmsa leh an hmingte, ration card-a awmsa te kha kan hmang chhunzawm mai dawn a ni. Tuna Golden Card hmang mekte pawhin a thara registration an tih a ngai dawn lova, sawrkar hnathawk nghet, PE leh MR-ten an zawm vek dawn a, Civil Pensioner-te pawhin an zawm vek bawk ang. Kan tihhmaih palh CSS hnathawkte pawh kan telh dawn a, an tel theihna tur category kan siam ang. Mizoram Universal Health Care Scheme-ah hian damloten damdawiin an luh leh chhuah inkara an senso zawng zawngte an pek ngai lovin sawrkarin a lo buaipui fel vek mai dawn a ni. MUHCS hnuaiah hian man chawia inziaklut card var hmangtu Rs.2 lakh bill thei thinten Rs.5 lakh thleng an bill thei tawh dawn a, damdawiin General Ward-a awm duhte chhungkuate chu kum khat atan Rs.2500 -in an in register a ngai dawn a, Rs.2000/- ni thin kha Rs.500/- pek belhin Rs.5 lakh thlengin an bill theih phah dawn ta a ni. Golden Card hmang thinte pawhin Rs.5 lakh thleng an bill thei dawn tho va, sawrkar hnathawkte erawh a kaldan pangngaiin limit chin awm lovin an nat dan ang zelin an bill ang a, amaherawhchu Finance Department-in a kalpui mek angin entitlement erawh siam a ni.  PE (Provisional Employee) leh MR hnathawkte pawhin Rs.5 lakh thleng an bill thei vek bawk ang. Civil Pensioner-ten thlatin Medical Allowances Rs.1,000/- an dawn hi sawrkarah chhunglutin Rs.12 lakh thleng an bill thei bawk ang. Sawrkarah dual benefits a awm theih loh avangin an tana tha tur zawk duansak an ni,” a ti.

Health Minister chuan, “Health Care Scheme-a inziahluh man hi thenkhatin a sang kan ti deuh mai thei a, mahse hun hmasa nen khaikhin chuan a sang lo. Rs.5 lakh bill thei tura Rs.2500/- a inziahluh hi a na lova, semi private-a awm duhten Rs.5,000/- a an inziahluh a ngai dawn a, chhungkaw pakhatin kum tluana damloh ni khuaa private cabin-a kan awm theihna turin Rs,10,000/- a inziahluh hi a na lo em em a ni. Inziahluh hun hi tuna kan hawng tawh a, thla thum chhung hun kan hawng ang. Chumi hnuah thla khat kan chawl ang a, hun kan hawng leh ang. Sawrkar damdawiin ni lo private damdawiinte pawh MUHCS hnuaiah hian tel turin kan sawm a, chutihlaiin sawrkar chuan a tih tur hmasa tiin sawrkar damdawiin zawng zawngte tihchangtlun kan tum a ni. Tunah hian sawrkar chuan chak taka hma lain inbuatsaihna a kalpui mup mup mek a, a buaipui bik tur thlengin post te kan siam thar a ni,” a ti.

A Department chan, chak leh lian zawka thuamthat an tum thu sawiin Health Minister Pi Lalrinpuii chuan,  “Lung zai (Open Heart Surgery) man hi private hospital-ah Rs.8 lakh-te a nih laiin ZMC-ah chuan cheng nuai khat leh sing nga vel bak sen a ngai dawn tawh lo a ni. Thluak zaina (Neurosurgery) khawlte pawh kan nei thuai dawn a, doctor thiam tak kan nei dawn bawk. Chutiang zelin natna hrang hrangah doctor thiam lehzual, super specialist-te kan ruai dawn a, Kal thlak thlengin Mizoramah tih theih a ni tawh ang. IVF te pawh ZMC&H-ah kan tih ve ngei theihna turin sawrkar chuan hma a la mek a ni,” a ti bawk.

Sd/-

(BRIAN LALNUNHLIMA)

Secretary

Media & Publicity Department

ZPM General Headquarter, Aizawl

PR No. ZPM-02/02A/2025/31

Dated 24th March, 2025