Lasi pukah darkar thum-Part 1

LASI PUKAH DARKAR 3 CHHUNG!

~Saihmingliana Sailo

(Part-I)

Khami zana kan țhian duna atuka ramchhuahna tur kan sawi hawt vel kha mak tak mai hian hun danga ramchhuahna tur rela kan sawi dun fo țhin ai chuan ka phur surh surh hle mai. Zangkhai deuh vah hian kalna tura kan rawt, ram pilril ang reng tak chu mu chung hian mitthlain ka lo fang lawk vel a. Sa engemaw ber chu kap ngei tura inrinna lian tak hi ka nei ru veng veng a, ka phur tulh tulh a, kal hlan ka nghakhlel tawh nasa mai a, khua var thuai thuai se ka ti kher mai.

Ramchhuahna tura kan sawi hi ngawpui, hmun zau tak, miten ana zawnga an tlawh pawh zen zen loh Lo atan pawh an neih ngai loh hi a ni a. A chhan chu tunhma ațang tawh khan pi leh puten, ' Pangen ram,' an lo tih țhin kha a ni a, lo atana nei apiang chu pa ber hi mak tak maiin a boral ziah nia an lo sawi țhin vang a ni. Chutianga mi tlawh pawh zen zen loh a nih vang chuan sa chi hrang hrang pawh a tam thawkhat hle a, pasalțha huaisen fal bik ramvak chu hlawhchhamin an haw ngai lo a ni.

Khua a lo var a tukțhuan kan ei kham hnu chuan muang charh hian chu hmuna ram chhuak tur chuan ka insiam malh malh a. Silai leh a mu te chu zan lama ka enfiah vek tawh avangin chaw ka fun a, ka țhianpa chu ka sawm a, kal chhung a rei deuh dawn avangin dar 10 ah chuan kan tum ram pan chuan kan chhuak ta a.

Sawi tawh angin ni danga kan ram chhuak tur ai chuan ka phur a, kawng chho tak tak kan kal lai pawh chuan hah chu sawi loh a hmun thlen hlan ka nghalhlel em em a, ka țhianpa chuan, 'I kal chak lutuk, zawi muangin kal ila, a hmun kan thlen chuan sa changa țhut hun tawk vel a ni dawn alawm,' a ti a, sa kap lova kan haw ka rin loh thu te leh hmundanga kan kal tawhna chanchinte sawiin kan ri bawrh bawrh a, kawngchhak leh kawngthlangah te chuan Ramar leh Vahrit te kan phawk thlawk nual a. Kawn nuam ang reng tak kan thleng dawn hnai tihah chuan kawngsira Sakhi lo tla mek chu kan hmuh lawk loh avangin kawngthlang lam pan chuan a tlanchhe rak rak a, a hmun tak kan la thlen loh avangin kah tumin kan veh zui duh lo va. Kawn kan thlen chuan chawlh kan rawt a. Mei zukte siamin chuta țang chuan ințhena mahni channa hmun tur pana kal zai kan rel a. Ka țhianpa chuan rah tlan tamna hmun lam, sa pawh a tamna hmun nia an sawiah chuan kal turin min ti a. A kal khante leh rah tlan awmna hmunte min kawhhmuh hnu chuan Sa chan zawhah kan kap emaw kap lo emaw chumi Kawna innghak leh tur chuan kan ințhen ta a. Thawm dim thei ang berin mahni țhut hmun tur chu kan pan dun ta a ni.

Chawhnu lam dar 2:30 a ri tawh a, dar 3:00 a sa channa tur hmuna țhut fel hman tum chuan muangchangin Sa hnu awmdan te uluk taka en chungin ka chan tur rah tlan awmna lam chu ka pan a. A hmun ka thlen chuan rin lawk ang ngeiin Sa hnu chu a chiarin a lo chiar dup mai a, theirah an tlan pawh leiah chuan a rah tla hmuh tur a awm mang lo va, sa hnu erawh a thar țha hle thung.

Rah tlan kung bulhnaia țhutna tur remchang ka zawng a, khawilam ațang pawha Sa lo chhuak lo hmuhchian theihna tur ber nia ka rin thingkungah chuan lawnin țhuthmun ka rem ta a. Sana kan en a, dar 3:07 a lo ni a. Ka iptepui chu ka bula thingkakah chuan ka bang a, silai mu ka thun fel a, ka țhu ta ran mai a.

Ka bul hnaiah chuan sava chi hrang hrangte chu thlawkin an hram chel chul hlawm a. Ral lehlamah chuan Zawng rual khawsa ka va hmu a, raw lerah te chu an uai kur zawk zawk a, thingkungah te chuan an ban zawi zawi a, an hmuhnawm kher mai. Ni dang chu nise kah tumin ka veh ngei ang. Tunțumah hi chuan Sa tih tham deuh, Sakhi, Saza, Sazuk bakah Savawm emaw chan chhuaha kah ngei ka inbeisei a ni.

Chutia ngawi renga mit leh beng chhi rana ka țhu chu zan lama ka helhhawlh mutmu tuah țha mang lo ka nih vang nge ka lo țhu mu sek a, ka harh leh meuh chuan ni tlak sar an tih ang hun hi a lo ni reng tawh a, ka beng kan chhi a, zawi zawiin ka mit kan len kual pah bawk a. Ka rah tlan channa lam pan chuan sa thawm niawm tak hi chhaklam leh chhimlam ațang chuan a rawn ri sat sat mai a. Thawm an dim danah chuan Sakhi a ni lo ang tih ka ring a. Ka inherrem hret hret a, ka silai chu ka hum nghet sauh bawk a.

Part-2