Sial Vulhna hawng

 CHIEF MINISTER PU LALDUHOMA'N THENZAWL VETY FARM-A SIAL VULH PUNNA HMUN TUR HAWNGIN, ARTUI THARCHHUAHNA HMUN TUR LEH THIR PHAN LEI DAWHNA TUR LUNGPHUM A PHUM

Dated Thenzawl, 8th May,2025: Vawiin khan Chief minister Pu Lalduhoma'n Thenzawl Vety Farm-a Sial vulh punna hmun thar leh Artui tharchhuahna (Mega Egg Production Farm)hmun tur bakah Thir phan lei (Bailey Bridge) dawh tur lungphum a phum a, he hunah hian Vety Minister Pu C.Lalsawivunga,  DM&R Minister Prof. Lalnilawma leh Pu V.Malsawmtluanga MLA ten an telpui.

Thenzawl Vety Farm Complex a inkhawmtawi buaihsaih chhunzawmah Chief Minister Pu Lalduhoma chuan thu sawiin,"State pawn atanga artui kan leina hi kum tin Vaibelchhe 22 vel a ni a, hei hi uiawm tham tak a ni.Hei leh chen UT leh State kan nih hnua Artui atanga intodelh bul tan ngaia kan la awm hi a lungchhiatthlak ka ti a, hun hlu kal liam ta te kha a pamhmai ka ti hle a ni. Sorkarin Hand Holding policy mipuite tan a kalpui mek hi a aia tha state dangah pawh a awm chuang lo a, chuvangin ranvulh tute pawhin banakaih Scheme hi inhlawhtlinpui ngei ka beisei a ni," a ti.

CM chuan, "Kan minister chhuanawm tak Vety Department changtu Pu C.Lalsawivunga leh Department te hmalaknain ran vulh lama hmasawn tur leh Artuia intodelh turin hmalakna chak takin kalpui a ni a, keipawhin ka theih tawp chhuahin he project hlawhtlin theih nan hian ngaihtuahna ka senga, intodelhna project a nih angin ka ngaipawimawh hle a ni. He project sum hi a nihna ang taka kan hman ka duha Eirukna (Corruption) a in rawlh thiang lo a ni," a ti.

Pu C.Lalsawivunga AH&Verty Dept Changtu minister pawhin thu sawiin,"Kawng hrang hranga ram hmasawnna ngaihtuahtu Chief Minister Pu Lalduhoma kaihhruainain kan ram chuan hmasawnna lam kan pan chho mek hi ka lawm hle a. State pawn atangin sa leh artui kan la lut renga hengte hi an hrisel tawk em tih hi ngaihtuah a ngai hle a, sa thianghlim leh hrisel kan neih theih nan kan tharchhuah ngei hmanga intodelh a tul hle a, chumi tur chuan ranchaw a intodelh hmasak a ngai a, tunah hian Saitual leh Champhai district khaw thenkhat atangin chhungkaw thlan bik ten pilot project angin Vaimin an ching tan mek a, hei bakah khawvelin ran chaw atana a buaipui mek 'Blue African Flies' kan buaipui mek a, rannung tereuh te te an ni a, heng hi a tihpun dan kan ngaihtuah mek bawk a ni," a ti.

Vety Minister chuan,"Ram leh hnam intodelh ni tur leh hnam hrisel ni tur chuan mahni tharchhuah ngei hmanga ei leh bar kawnga intodelh hi tihmakmawh a ni a, chu chu hriain keini pawhin Chief Minister Pu Lalduhoma kaihhruaina hnuaiah theih tawpin hma kan la mek a ni. Mipuite pawhin sorkar thar rilru hriaa intodelh kawnga rilru thar pu theuh turin mipuite kan sawm a ni," a ti bawk.

He hunah huan Prof. Lalnilawma DM&R Minister pawhin thu sawiin,"Mizote hi pi leh pu atanga ran nen in hne hnai tak kan ni a, chutih rualin vawiin thlenga kan mamawh kan la intodelh thei lo hi engvang nge ni ang tih hi ka ngaihtuah fo thin a, a chhan ber ni a lang chu ran vulh kawnga tihtak zeta hma latu kan la tlem vang leh hlawhtlinna tak tak thleng phak khawpa ranvulhtu kan la awm mumal loh vang a ni. Chuvangin state pawna kan sum tam tak kalral thin kan hum theih nan ranvulh lama tan la turin kal khawmte ka chah a ni," a ti bawk.

Hei bakah hian Chief Minister Pu Lalduhoma hian Mizorama MzSRLM hnuaia Community Managed Training Centre (CMTC) hmasa ber,     Vantawng Cluster Level Federation tana sak, Thenzawl ami chu a hawng bawk a ni.

Issued by

Media & Publicity Department

ZPM General headquarters Aizawl

Issue No 99 of 2025

Dated 8th May, 2025