OPERATION WHITEWASH
OPERATION WHITEWASH. INDIA-IN A RALTHUAM THULKHUNG KALI A HMANNA
~ℤai ℛemthanga
Siachen Glacier-ah Gayari sector-a Pakistan sipaite post chu Vur tawlhin a chim pil thut mai! An va hrihhai dawn tak em! Engtia Vur tawlh thinna hmun pawh ni lo chu Vur tawlhin a chim tak huk ni ang le? Pakistan sipai 130 vel zet chu Vur 80ft-100ft vela chhahin a vur bo ta vek mai kha a ni si a. He thil hi Siachen Glacier-a thil thlengah chuan a rapthlak ber an tih hial thin a ni a, he thil hi khuarel chhiatna chu a ni bawk si lo!
He thil a thlen chiah hian Pakistan ramah chuan inhnialna a chhuak nghal a, Gayari sector ah hian Vur tawlh sawi tur a awm ngai bawk si lo nen, an rilru a buai tlang hlawm a ni. Mi thiam zawkte chuan rinhlelh chu an nei ngei a, chu chu Vur tawlh kha khuarel ni loin hmelma ram thil tih a nih ngei an ring a, India-in a laser weapon KALI a hmang ngei niin an ngai a ni. Ram hrang hrang pawhin mak an ti a, US, Russia, China leh Israel ngei pawhin mak an ti hle a ni. A nih leh eng thil nge thleng chiah ni ang? India-in silai hmang miah loin hmelmate nuai chimit turin engtin nge Vur chu a tawlhtir theih mai le? Chhuiho ang u aw.
India-in Vur a tih tawlh dan tak kan sawi hmain India ralthuam thulkhung KALI chu eng nge a nih han hre hmasa ta ila. KALI han tih chuan Hindute pathian pakhat KAALI mitthlaah a lang mai thei, hang dum renrun, Lei chhuah perpur kha. Mahse, a ni lo a, chumi hming chawia phuah lah chu a ni hek lo. Ralthuam hlauhawm lutuk, KILO AMPERE LINEAR INJECTOR (KALI) tihna daih a ni. Silai a ni lo a, missile pawh a ni lo. Directed Energy Weapon a ni a, Laser chak tak mai, electron beam pe chhuaka hmelma thilte lo chhun chhe hmak theitu a ni. A siamtu chu DRDO leh BARC te an ni a, India kut chhuak liau liau a nih chu. He KALI hna thawh dan ber chu hmelma thil lo thlawk emaw, a hmaa a hmuh emaw kha Laser beam chak lutuk tak mai hmangin a chhun a, che thei loin a siam zui a, a chhe mai thin a ni.
KALI hi version hrang hrang a awm a, A tirah chuan chak em em lem lo, KALI 80, 100, 1000 leh tunah chuan 5000 thlengin siam a ni tawh. A BM power pawh 40 Gigawatt ngawt a ni hem mai! He KALi 5000 hi chu a lianin a rit em em a, lak sawn ve mai mai theih pawh a ni lo. Official tak chuan a siamtute pawh hian eng mah an sawi lo bawk. A nih leh KALI chu khawiah nge, eng atan nge an hman tih kha hre leh dawn teh ang.
Kum 2009 ah chuan Kashmir-ah Vur a tawlhin a tla nasa em em a, chu chuan kawngpuite pawh nasa takin a hnawh a, Lei verh kawng (Tunnel) te pawh a tawn tawnin Vurin a hnawh vek a ni. Chumi thian fai tur chuan Border Roads Organisation (BRO) te chu ruat an ni a, anni pui tur hian DRDO hnuaia Laser Science and Technology Center (LASTEC) te pawh ruat an ni. Rang taka then fai a nih theih nan ngaihtuahna an seng dun ta a, DRDO chuan motor hmangin laipui ang tak mai, a panga KALI tih inziak chu an rawn thawh chhuahpui ta! He laser hian Vur chu a han kap zeuh a, tam vak loin a rawn tawlh a, chu chu an lo thian fai zung zung a, a then chu kawng thlang lamah an tawlh liam zung zung bawk a, nasa taka Vur tawlh a siam lo thung. Hna chak phah em em a, tangkai takin chu laser KALI chu an hmang a ni.
Mak tak maiin chulai hmunah chuan Research and Analysis Wing (R&AW) senior Field Officer pakhat chu a lo awm ve reng mai a, DRDO khawl mak leh changkang tak mai, a tawk leka hna thawk thei, Truck hmanga phurh zung zung theih bawk si a hmuh chuan a meng phawk hle mai a, a han zawh chian chuan Laser gun, Vur a han chhun a, a tawk chauha vibration siam thei, KALI ngei a nih thu chu an lo hrilh a. A rilru chuan thui tak thlir zui nghalin, Vur tlem tete a tih tawlh theih a nih chuan nasa taka tawlhtirin hmelmate beih nan a hman theih ngei dawnin a hre ta a, hmelmate beihna ralthuam tha tak a ni dawn tih chu a ring nghet bur ta mai a ni. Hei tak hi Operation Whitewash intanna pawh a ni ta.
Tichuan he officer hi Delhi ah kal vang vangin an hotute hnenah chuan thil awmzia a han hrilh nghal zung zung a. Mahse, eng hehu-ah an lo ngai duh lo. A rilru a luah tlat avangin LASTEC leh Vur tawlh lam chanchin zir bing mi Avalanche Agency lamte a be pawp reng a. Tichuan, Sipaite hman tur, Military weapon ah siam theih leh hman theih a ni tih report chu a ruka peih felin khatih laia National Security Advisor MK Narayanan beng a thleng zui a, siam chhunzawm leh bawh zui turin green signal pawh hmuh a ni ta a ni. He project chungchang hi mi pawimawh tlemte chauhin an hria a, Army, Navy leh Airforce lam atangte'n mi bik thlang chhuakin project chu an kalpui a, a hmingah Operation whitewash an ti ta a, an tum ber chu India ram thlithlai rengtu, Pakistan sipaite awmna hmun Vur tawlh hmanga chhilhtir chu a ni. He thil hi a ruk thei ang bera kalpui a ni a, hria pawh an tlem hle.
DRDO kutah chuan laser gun KALI tih changtlun leh tih chak zawk hna chu a awm ta nghal a, chhun zan zawma an beih tak tak hnu chuan power chak zawk pe chhuak thei KALI version tha zawk chu an siam chhuak thei ta a. Sipai lam pawhin an beih tur Pakistan post lam zir chian hna an thawk ve reng bawk a, chu chu Northern Light Infantry Battalion Hqrs, Pakistan awp chin rama in khuarte chu an ni a. Satellite thlalakte nen an zir chiang a, laser-a kah hnua Vur tawlh hum hum theih dan tur an ngaihtuah a ni. An tih sual vaih chuan an beisei loh zawnah Vur a tawlh daih thei a, tawlh miah loin a awm thei bawk a, chuvangin Scientist te nen an zir uluk hle mai. Chu lo pawh chu thil buaithlak a la awm cheu! Hmanraw lian tak phurh kualte, Lei lam atanga kah chhuahte chu buaina a ni. Lei lam atangin kap ta se, mahni ram chhungah a rawn tawlh hum hum thei a, KALI khawl ngei pawh a chhilh bo daih thei. Tichuan, ngun taka an ngaihtuah hnuah Van boruak atanga kah chu an ti tlu ta a, chutiang a nih chuan kah zawh veleh an thlawk sawn ang a, khawl pawh a him ang a, hmelma pawhin an hre thei lo ang. India ram chhung atanga kah a nih dawn avangin.
Mahse, a san em avangin laser hi a thawk na lo palh ang em tihte an ngaihtuah a, chuvangin sientist-te nen chuan en chhinnate an nei a, chumi hnu chuan India thlawhna lian IL-76 ah chuan an bun (install) ta a, Odisha-ah thlawhna chu KALI 5000-bunna turin an ti danglam ta hlek hlek a nih chu. Hemi tur hian IL-76 hi pahnih hman a ni a, a chhan chu pakhat zawk a lo che fuh deuh emaw, kah nawn a ngaih pawha kap ve nghal turin an ruahman a ni. Kan IL-76 chu Laser canon thlawk theiah an chhuah ta der mai le! Tichuan, a hun taka che chhuak thei turin Sarsawa Airbase, Saharanpur Uttar Pradesh-ah chuan inring rengin an dah ta. Tin, lei lama inbeih thut a ngaih pawha che nghal thei turin Airforce Commando, Garud te chu an duty nghal vek bawk a. Van lamah ni se, hmelmate thil hlauhawm thlawk a awm em tih thlithlai turin Airborne Warning and Control System (AWACS) pawh vil turin a thlawk kual reng a, (AWACS hi Van sanga Control system tha lutuk tak mai, hla tak taka thil che vel pawh lo hmutu, a tulna hmuna hrilh chhawng zung zungtu, khawl changkang thlawk thei a ni)
He mission an tih lai hian eng emaw avangin IL-76 thlawhnain a tui tlachham thut ta se tiin Tanker lian chu thlawhtir tur a ni a, a tul a nih chuan Van sangah a tui a thunsak zung zung dawn a ni. Tin, Pakistan lamin an lo hriat palh hlauh takin tih thil thu-ah Indo thlawhna Mirage-2000 paruk leh Sukhoi30-Mki pahnih chuan an vil reng bawk ang. Pakistan lamin he mission ti thuanawp zawnga chet an lak vaih chuan kan indo thlawhnate'n an chhu hrep dawn tihna a nih chu. Tcihuan chhun lai taka operation neih chu an tum ta a. A chhan chu Siachen hmuna Vur tawlh reng reng chu chhun lamah a nih thin vang a ni. An hlawhtling ta a nih pawhin khuarel chhiatna a ang lehzual dawn a. Mahse, an han zir chiang leh deuh a, chhunah an tih chuan laser-in a duh angin hna a thawk lo palh thei tih an hre chhuak leh ta a. Tichuan, 7th April, 2012 zing dar 4-ah chet lak an ti tlu ta a ni.
A hun a lo thlen dawn chuan an phur viau nachungin hlauhthawnna pawh an nei ve tho mai. Tih sual palh chuan khawvel hmaah India a mualpho dawn si. A hun chu a lo thleng ta ngei a, zing dar 3-ah chuan IL-76 thlawhna pahnihte chu an tum ram pan turin an thlawk chhuak ta! A chhungah chuan KALI lam mi thiamte chuan an thut chilh ran mai a. Tin, AWACS pawhin Pakistan lam thil chet vel dan a zir chianna report a thawn reng bawk a, an hmaah hlauhawm a awm loh thute a hrilh char char a ni. Tin, indo thlawhnate pawh an thlawk chhuak ve tawh bawk a, Lei lam atangin ISRO-te'n an thil tih tumna hmun satellite thlalak thar tak takte chu an pe zar zar reng bawk a. Tichuan zing dar 4- a lo ni ta. IL-76 pakhat chu 30,000ft vela sangah chuan thlawkin a target chu a tin ran mai a. A hnung lawkah IL-76 pakhat chuan a rawn zui ve zel bawk a. Khua pawh a tha viau. Thimthamah chuan Vurte chu an eng phet phet a, Pakistan lam hian eng mah an hre lo a, an awm dan pangngaiin an awm mai mai tih pawh Satellite thlalak atangin an hre thei.
Tichuan, lei lama command center atang chuan 'kap rawh' tih thu pek chu IL-76 chuan a dawng zui ta! IL-76 atang chuan KALI chuan tlang sang taka Vur chu a chhun ta pawp mai! A han chhun vang vang a, hmelma lam hian eng mah an hre lo. Chutia a han chhun vang vang hnu chuan Vur chu a rawn tui ta tuam tuam mai a, a nghawr det det a, Vur tam lutuk tak mai chuan hnuai lam an pan a, an tawlh ta pur pur mai! Dan chi lah chu a ni der mai si lo a, chhiatna chu a thlen ngei dawn. An kah zawh hnu chuan thlawhnate chu an thlawk let nghal vang vang a, Lei lam atang leh satellite atang chuan thil awm dan chu an thlir zui nghal a. Dar 4:40am ah chuan Vur chu nasa mangkhengin a chimin a chim thla ta hum hum mai kha a ni a, Operation whitewash chu a hlawhtling ta reng mai. Darkar khata 300kms vela chakin Vur chu a tawlh a, Pakistan sipai post chu a khuh bo hneh hle!
Thawm an hriat veleh Pakistan sipaite hian phone leh wireless hmangin biak pawh an tum ve a ni awm a. Mahse, chet an la hman reng reng lo. Pakistan sipai post chu Vur chhah takin a khuh bo zo tawh a, tu mah hmuh tur an awm tawh hek lo. Whitewash dik tak a thleng a, Vur varin a chhilh fai hneh hle a ni. India thlawhnate chuan an hmun an rawn thleng leh ta vek a, AWACS pawhin Pakistan lam atanga chet velna reng reng a hmuh loh thu a rawn hrilh ve bawk a, Pakistan hian thawm riva chhete pawh a hre lo tihna a nih chu. Thil thlen hnu hian Pakistan chuan India thil tihah a pawm duh tlat lo. A chhan chu an rin phak bakin India hi kan lo turu tlat a ni. Khuarel chhiatna angin an puang ta ngawt a. Record-ah chuang lo mah se, Pakistan mi thiamte chuan Gayari sector-ah chutiang taka Vur tawlh nasa a thleng chu mak an tih thu leh India-in Laser a hmang ngeia an rin thu chu an sawi ve a, ziak erawhin khawiah mah an hnutchhiah ngam lo thung. India-in a beihna anga an sawi chhuah vaih chuan a mualpho tur chu Pakistan an ni tlat a.
Tin, finfiahna emaw, han chhui theihna emaw, eng mah India hian a hnutchhiah si lo a, Laser hmanga kah a ni miau bawk si nen, Pakistan tan hian sawi tur a vang viau. India pawhin Official takin Laser-a a kah thu hi a sawi duh bik lo bawk. Khawvel pawhin eng mah an sawi zui lo. R&AW hian he mission atan hian DRDO, ISRO bakah Sipaite a ruala a hman vek vawi khatna a ni hial. He KALI Laser weapon hi India hian a neih thu official takin a puang ngai lo hrim hrim a, project a kalpui tih erawh a puangzar tho thung.
India hi tam tak chuan kan han fak deuh pawh hian kan ngainep lui tlat thin. Mahse, USA a scientist leh Daktawr tha ber ber khu Indian an ni tih erawh kan hre lo a ni mai thei. US thluak bur ber chu Indian an ni. India hi a ropui zual zel a, US pawh a tlawn ve du du lo. Ram dang erawhin an hlauhzia kan hre vek awm e.
https://youtu.be/-yKhUC0dnYE
Ngaithla duh tan 👆 ah khian luh mai tur a ni. Page follow, channel subscribe, like leh comment kha a remchang vek aw. Kan channel ah kan chhiar tawh avangin lo chhiar chhawng lo hram turin youtuber te ka ngen mawlh mawlh a che u.
Comments
Post a Comment