Mizo nih hi a va nuam em!

Mizo nih hi a va nuam em!

~J. Sawma Vanchhawng

Kan veng, Zemabawk Galilee Veng-ah hian unau mipa pathum an awm a, anmahni enkawltu ber an nuin a boralsan hnuah an unauin an khawsa chho ve naw naw a, an upa ber chu Ningani tuk khan 'bawihtu' awm tawh lohna leh thawhrimna awm tawh lohna hmunah a lo chawl ve leh ta.

Tuna boral ta leh a nau chiah hi inkawp chawt an ni a, unau an ni a, an inkawmngeih dan a satliah lo a, engtikawng maha then hran theih loh khawpa engtik lai pawha inzui reng an ni.  Vanduaithlak takin ruihhlo bawihah an tang ve ve a. Khawvel thilah chuan ropuina an nei lo a, an unau inhmangaih tawnna erawh thua sawifiah phak bak a ni. Liandova te unau thawnthu ang maiin, eitur an neih apiang an in pe tawn a, chutiang zelin thil tha leh tha lote pawh an inpe tawn zel. 

Bawihtu chak tak an neih chuan a ti buai em em a, chuti chungin thil thlawn pek anih loh chuan an mahni ta lo chu midang thil an la ngai lova, an thawk bawrh bawrh a, an mahni bawih nghet tlattu avangin an mamawh tawk leina thawk chhuak turin khaw engin a daih seng lova, zanah nen lam thawh tur zawngin an inhlawhfa a. An hnathawhna hmunhma felfai takin an chingfel thlap thlap a, an taimak em avang leh an sulhnu a felfai thin em avangin hnathawka chhawrtu erawh an van ngai lo.

Mihring pangngai taksa ang pu ve tho an nih si avang leh anmahni bawihtu lak ata an tal chhuah theih bawk si loh avangin, chhun zan zawma rim taka thawh reng chu a u zawk taksa chuan a tlin ta lo a, thawk leh khatah thang awk ang maiin natnain a man ta thut a. Veng chhung mi tlawmngaiten buaipuiin Civil Hospital an panpui a, khum a awm remchang lova, ZMC lam an bia a, khum a awm nghal mai lo leh bawk a, mi thahnemngaiten biak kual theih ang angte an biak hnuah sorkar hotu lamin ZMC ah enkawl theih dan tur ruahmanna an siampui thei ta a, chutih mek laiin a natna a lo zual a, ICU-a enkawl ngai a ni tih Doctor ten an sawi ta mai a, a manganthlak zual ta hle. 

Sorkar Damdawi in-ah ICU ruak a awm lova, Private Damdawi in ICU-a inenkawl tur chuan sum senso a tam hle dawn tih a lang reng mai si. An dam that ve hram hram lai pawhin nitina an mamawh khawp thawk chhuak hlei thei lo an nih avangin Health Care Scheme emaw, Health Insurance dang emaw engmah an ban phak lo bawk nen. 

Amah buaipuitu YMA Zemabawk Branch hruaitute, Vankhama Section YMA hruaitute, Galilee Veng Welfare leh MHIP hruaitute ngaihtuahna a buai hle, 'Thih leh dam kar a ni a, a tul chuan veng chhung mipuiin kan thawh khawm ang a, a mamawh ang enkawlna chu a tha thei ang ber a dawng ngei tur a ni' tih chu an inlungrual tlanna a ni. 'Dam leh tlang khatah, thih leh ruam khatah' tih thuthlung vawng tlat thin Mizo pasaltha huaisente thlah kal zel kha kan la ni miau a. Chu thisen luanna mizo nula tho chu Civil Hospital-ah a lo duty mek bawk a, a hote nen enkawlna tha thei ang ber an lo pek mai bakah chu Doctor, mizo nula dik tak rilru pu mi chuan chu tlangval, a laka beisei let tur engmah awm hauh lo chu Civil Hospital Emergency Dept.-a an enkawl chhunga a damdawi man zawng zawng a lo pek sak vek mai a, mizo tlawmngaihna a takin a par chhuahtir a ni. 

Ti chuan Ebenezer Hospital ICU lamah beiseina sang tak neiin kan tlangval sawi hi dahluh a ni ta a. Ebenezer Hospital neitute pawh Mizo nula leh tlangval dik tak, Zo nun ze mawi leh tlawmngaihna a taka nunpuitu an lo ni leh zel a, an ICU hmanrua zawng zawng chu a thlawnin an hmantir vek a, damdawi man bik erawh pek ve theih anih chuan an ti chauh a, bill pangngaiah cheng nuai chuang fe chawi ngai tur kha Rs.67000/- ni turin an ti hniam ta duai a. Hetih mek lai hian veng chhunga remchang hriate an phe sang sang bawk a, CM Relief Fund Rs.10,000 lai dil chhuah a ni a. Zemabawk-a Salvation Army, Baptist Kohhran, Presbyterian Kohhran leh Seventhday Adventist Kohhrante an rawn pen chhuak bawk a. An laina hnaite leh veng chhung mi tlawmngaite thawm khawm nen, Damdawiin bill chu vawiin 12.07.2025 khan Ebenezer Hospital hotute kutah lawm takin khawtlang hruaituten an hlan fel a, bat zawng zawng chu tlak a ni ta.

Khatia, Ebenezer Hospital ICU panpui anih hma, Civil Hospital-a an la awm mek lai khan Vankhama Section Asst Leader Pu Tete-a hnenah kan tlangval sawi mek hian 'Pu Tete, Pathian hian min la ngaidam ve duh ang em le' tiin inthlahrung hmel takin a zawt a, mittui nen Pathian hnenah inhlanna hun an hmang dun a, a hnu lawkah nikhaw hre lovin a awm zui ta nghal a ni.

Ningani tuka a thih thu hriat a lo nih takah khan engtinnge ni ang? an chenna in lah chu mipui punkhawmna turin a te lutuk a, a panna kawng a remchang lo bawk nen, zawhna a tam a, an laina hnaiten khawtlang hruaitute be rawnin, in vui liam nghal mai pawh an remtih thu an thlen a, veng chhung hruaitute erawh chuan 'Sawmtea hi kan veng tlangval a ni a, mawi tak leh zahawm takin kan thlah liam dawn' tiin an chhang a, a ruang dai zahna lantirna hmun atan veng chhunga sokar building remchang, Primary School chu thuneitute dil chuk chukin, chutah chuan thlai rualten an tlaivarpui a, hun dang zawng aiin tlaivar an tam a, zai a nuam em em a,  a tuka vui inkhawmah pawh thlahtu mipui tam tak an pungkhawm a ni.

Ruang thlak zan, YMA hunah zai a nuam a, a zan hnihna, a tawp zan ni bawk, nizan phei kha chuan YMA Zemabawk Branch huam chhungah mitthi pahnih dang an awm chungin, thalai rual 200 chuang zetin Pathian fakna hla sain Sawmtea thlahna hun hnuhnung hi kan hmang a. Solfa hla kan sa a, kan zai tui em em a, hla thlan a tam a, hunin min daih lova, kan sa seng lo a ni.  Sawmtea khan mi pawi a sawi ngai lova, kawng lakah tu pawh tawk se, kawng sir takah inthlahrung takin a pel a, an biak hram pawhin tu mitah mah a en ngam ngai lo. Ruihhlo avangin inthlahrung reng rengin a dam chhung hun a hmang ral a ni.

A hun a tih takah Pathianin amah kohna chang hre turin Sawmtea kha a siam a, Zo nun zemawi, tlawmngaihna vul tirna hmanruaah a hmang a, khawvel thilah ropuina nei lo mahse, hun a tih takah Pathianin a chawimawi a ni.