RAMRI-AH INKAP

#AIRNewsAizawl : Falam helho CNDF ten Hualngo ram mipui sipai CDF te Camp lain Hualngo ram an thuhnuaiah an dah ni a thudawn a ni.

Tukin dar 8:30 vel atang khan Zokhawthar bul, Tiau lui kama Khawmawi khua a Chin National Defence Force (CNDF), Falam lam mite leh CDF - Chin Defence Force (Hualngo sipai) te an in kap a,  CNDF ten Hualngo rama Hualngo Sipai, CDF te awp chin a Camp zawng zawng chu luhchhuakin, an thuhnuaiah an dah fel a, CDF te awp Camp pariat atangin CDF te hi an taksa himna zawngin an tlan darh vek tih CDF hotute hnen atanga dawn a ni. 

Zokhawthar Branch YMA chuan Information Centre atangin mipui hriattirna, ralkhel dar ti riin Helho inkahna avangin Zokhawthar ah silaimu thahnem tak a rawn leng phei a, mipuite fimkhur tura chahin pawn a chhuak lo turin an inhriattir a, hemi hnu hian Helho inkap mekte chu Zokhawthar lam hawia an silaite hmetpuak tawh lo tura ngenin, Zokhawthar mipui nun ti ralṭi zawnga Silai an hmetpuak lui zel anih chuan Zokhawthar a Myanmar atanga raltlan zawng zawngte, Zokhawthar atang Khawmawi ah dah phei vek an nih tur thu an hriattir a ni.

Vawiin khan CDF tam zawk chu Mizoram lamah lo lutin chawhnu dar 2:40-ah Silai puak pawh a reh a. He inkahna avanga thi leh hliam zat hriat theih a ni rih lova, CDF hliam tuar 5 zinga pakhat Champhai District Hospital-ah lak niin midang chu Zokhawthar damdawi inah enkawl an ni.

Champhai DC Pu Mohammed Aaquib hnen atanga thu dawn danin Zokhawthar mipui thlamuana, a tul anga hma la turin Champhai atangin Executive Magistrate tirh phei nghal a, Silpauline leh Blanket engemawzat raltlan tharte hman turin a pe a. 

Hel pawl pahnih te hi ramri a in sumdawn tawnna an thuhnuai a dah an duh vanga inkap ni a thudawn a ni a, nizan thim hlimah khan helpawl pahnih, (CNDF) leh CDF te chu reilote an inkap a, mi pahnih in nunna an chan ni a sawi a ni. Tun dinhmunah inkahna avanga hliam tuar a CDF mi 4 leh CNDF mi 2 te Zokhawthar damdawi in a enkawl turin lak an ni a, nizan lam atangin Khawmawi atang hian mi thahnem tak an rawn tlanchhe lut a, Mizoram lam pana tlanchhe zat hi hriatfiah theih a ni lova, hriat theih hnuhnung berah mi 500 zet chu an tling tawh a ni.