LAIRIL

Helai ah hian thinlung dek thawnthu, thu chi hrang hrang kan rawn dah thin dawn a. Phuahtu hrang hrang ten an lo ngaimawh lo turah ngai ila.

Lal pakhat hian bazara sal zawrhna hmunpui ah chuan nula pakhat, sal dang zawng zawng aia man to bik a awm tih a lo hriat chuan a danglam bikna hriat duhin lal inah a koh tir ta a.

         Chu nula chu mahni inringtawk takin Lal hma ah chuan a ding vah a. Lalpa chuan sal dang zingah chutiang ang mizia chu a la hmu ngai hauh lova.. Mak a ti ru ta hle a.

        "Eng vanga i man hi to bik viau nge anih?" a han tih chuan "Ka fin bik avangin" a ti mai a.

        Lalpa chuan "I finna i chhuang bawk a, zawhna  ka zawt ang che nga.. I chhan dik vek chuan i sal nihna atangin ka chhuah zalen ang che nga. I chhan dik loh chuan tihhlum i ni thung ang" a ti a...

          Chu nula chuan amah rawn hruaitu te chu a en a, "Ka thil neih chhun te kha lo fun fel ula, sakawr lo chhawp sa rawh u.. He hmun ațang hian sal ni tawh lovin mi pangai leh zalen niin ka chhuak thuai dawn e" a ti ta hmiah a.

       Lalpa chu chu nula inrintawkna chuan a hneh hle a. Tichuan heng te hi a zawt ta a...

    1.Khawvela thawmhnaw mawi ber engnge?

    2.Khawvelah eng thil nge rimtui ber?

    3.Khawvela eitur tui ber enge?

    4.Khawvela khum nuam ber khawnge a awm?

    5.Khawvel a ram mawi leh nuam ber enge ni?

       Chu sal nula chuan tihian a chhang ta a

1. Khawvela thawmhnaw mawi ber chu mirethei kawr neih chhun ani. Thlasik leh Nipui  ah pawh a tana țha ber anih avangin.

2.Thil rimtui ber chu Nu rim ani. A fate tan a rim chauh pawh thlamuanna ani.

3. Khawvela eitur tui ber chu țamchhawl tuarin a ei hmasak ber ani. Ril a țam chuan chhangthawp khawro hlui tawh pawh thil tui ber a ni si a.

4. Khum nuam ber chu rilru hahdam leh lungmuang taka i mut theihna khum ani. Rangkachak a luan, mutna dup eng ang ah pawh mu mahla.. i rilru a  pik lutuk chuan hling chunga mu ang mai i ni tho ang.. a ti a... Kawngkhar lam a pan ta a..

     Lalpa chuan "Ding teh... Ka zawhna hnuhnung ber i la chhang hlei nem" a tih chuan..

        "Khawvel a ram nuam ber maw?? Zalenna a awmna hmun.. Mi sual leh mi tawrawt, mi ngaihsam ten ro an rel ve lohna hmun hi a ni e" 

a ti ta a...

      A zalenna a hlawh chiang teh e..... A chhanna chu engpawh ni se...A Inrintawkna hian thui tak a thlen tawh hrim hrim....

       Khawvela ei tur tui ber, thawmhnaw țha ber, khum nuam ber te hi kan ban phakah kan nei vek a, ngaihhlut nachang hrelo a a dang kan zawnna lamah hian alawm kan kawl mek hi thil hlu lo zawk a kan ngaih țhin ni...

       I CHÂN TAWH HNU A I THIL NEIH TE LO HLUTZIA HRINGNUN HIAN  A ZIRTIR HMA CHE IN... TUNAH KHAN AN HLUT ZIA  HRIA ANG CHE.

oxoxoxoxoxoxoxOXOxoxoxoxoxo

Tlangval pakhat hian a pa, upa tawh tak chu ‘restaurant’ ah zan riah tui hnai tak ei pui turin a hruai a. A pa putar tawh tak chu a chak tawh lovin a kut te chu a khur zo tawh a. An ei ṭan chauh tih chuan a pa chuan chaw mal chu a kawr ah leh a kekawr ah te chuan a ti tla nghal pang a. Chu ‘restaurant’-a thil ei ve te chuan an thlir ṭhap a, ṭhenkhatin an khawngaih viau laiin a ṭhen chuan an lo nuihzat hlawm bawk a. Anmahni vanga phun rite chu tlangval chuan a hre reng nain hre lo ang mai hian a pa chu a buaipui mawlh mawlh a, ṭawngka nem taka biain a ṭul ang zelin a pui bawk a. 

An ei kham chuan a pa chu kaiin ṭhut chawlhna hmunah chuan a hruai a. A hmai, a thil ei in a tih berhte chu hruk fai sakin a thawmhnawte chu duat takin a siamrem sak zung zung a. A sam tlemte chu a khuih mam sak thlap bawk a.

‘Restaurant’ chhunga mi dang awm ve te chu an ngawi ṭhuap a. Chumite pafa an thlir dan chu a danglam ṭan ta. An ei man a pek hnu in tlangval chuan a pa kawrchung hak tir in chhuah zai an rel ta a.

Chutih lai tak chuan dawhkan dang kila ṭhu patling pakhat chuan a rawn pan hnai a. Chu pa hmel chu nelawm tak niin a mit meng pawh lainatna mit meng a ni.

“Min ngaidam lawk teh,” tih pah in chu tlangval hnenah chuan, “engemaw hnutchhiah neiin i in hria em?,” a ti zui ha a.

Chu tlangval chu hawi kualin an chaw eina dawhkan chu an thli thlai leh a. Chutah hawihhawm takin, “A...engmah hnutchhiah ka nei lo tur ah ka in ngai,” a ti zui a.

Chu pa chuan nuih sak pahin, ti tak hmai pu zet hian, “Aw, a nih chu. Mahse, hnutchhiah chu i nei alawm. Heta fapa awm zawng zawng tan hian zirlai i hnutchhiah a, pa zawng zawngte tan beiseina kawl eng nen,” a ti chhak chhak a. 

Chutih lai chuan ‘restaurant’ chu a reh ṭhiap a, chu pa thusawi chu mi tinte chuan pawm hmel an pu vek a ni. 

Nun ti zahawmtu ber pakhat chu min ngaihsaka min lo en kawltu ṭhinte ngaihsak let ve hi a ni a. Nu leh pa, kan tana an nun hlan zo tute hian phut let nei lova kan hmangaihna te, zah leh chawimawi te hi an phu hliah hliah a. Engtikah emaw chuan kan hun a inṭan ve dawn a. Chutih hunah chuan an tan thahrui leh innghahna tlak ni turin i inbuatsaih ve ila. He thawnthu in min hnutchhiah, nu leh pate laka hmangaihna leh zahna lantir hi kan bat a ni tih i hre reng ang u.

oxoxoxoxoxoxoxOXOxoxoxoxoxoxoxo

Mi rethei vakvai, chenna in pawh neilo hian kawnglai ah Dollar 2400 (India cheng 212917/- tluk vel) a chhar hlauh a... A rinawmna chuan nei  mai lova a neitu zawn chhuah tul a ti tlat a.. Police hnenah kalpuiin a neitu tur zawng turin a ti a...

      Police in a neitu an zawn kualna lamah chu pa rinawmna chu a tlang thang ta... A dinhmun an hriat chuan a puala sum thawhkhawm tur pawl an in din a, Dollar 5000/- zet an thawhkhawm a.. A pawisa chhar zat let 2 dawn tep chu... Chu pawisa va pek an tum chu a lo dawng duh ikhaw lo.....

    A chhan in hre duh em???

"Hnathawh tur min pe zawk rawh u" a ti tlat alawm..

    Nia... Dollar 5000 ai chuan hna in a damchhung a daih zawk dawn tih hre tur khawp in a fing alawm....

     Chinese thufing in "I fa kha sangha pe lovin sangha man dan zirtir rawh" a tih kha...

        Kan fa te hi sangha in kan hrai puar mah mah ani lo maw?? An retheih kan hlauh lutuk avang hian nakina an retheihna tur kawng kan kawh hmuh in kan zirtir te hi a ni lek lo maw??? Tunlai ah chuan.. Kan fate hi... Enkawl loh leh ngaihsak loh avanga mumal lo aiin.. Kan hmangaih leh duat lutuk avanga nikhualo hi an tam zawk hial in ka ring... In ngaihdan han sawi ve teh u....

oxoxoxoxoxoxoxOXOxoxoxoxoxox1oxo 

Nu pakhat hian Artui zuartu putar hnenah "I artui chu engzat man nge?" a han ti a.. Putar chuan "Pum 1 hi cheng 10/-  man ani e" a tia.. Chu nu chuan "Pum 6 kha ₹50/- a min pek phal leh ka lei anga, phal loh chuan ka lei lo mai ang" a ti a.

       Putar chuan " La mai ta che. Ka la inhralh miah lova, heti chuan chawei tur kan nei dawn lo" a tia..

      Chu nu chuan Artui chu leiin tifuh inti fahran in a kal ta a... A car changkang takah lutin Restaurant changkang zetah a kal ta a. A thiannu nen chuan  an eitur neih man to tak chu an order a, a zatve pawh ei lovin bill a han pe dawn a. An bill chu ₹800/- ani. ₹1000/- a phawrh a, ₹200/- bang chu restaurant changkang zet neitupa hnenah  tips atan a pe zui a....

            He thawnthu hi restaurant neitupa tan chuan thil pangai mai ani.. Mahse.. Artui zuartu putar tan erawh a fair lo hle ani.

              Engatinge a mamawh zawkte hlamchhiah a min mamawh lo tu zawkte bulah hian kan thilphal viau thin le?? Chhungkua ah pawh hian a harsa zawkte ngaihsak leh hmangaih tumlo a, a neinung deuh apiang be tha bik.. Tlawn bik... heng hi an awm fo nia.. Kan inhmangaih loh chuan unau tam hian awmzia a nei lova, chhungkaw hung tak nih pawhin awmzia a nei chuang lo... Englai pawhin kan inngaihsak thei lovang. Mahse harsatna tawh nikhua a chhungte pan theih.. An thlamuanpui theih nih i tum ang u....