DUHSAK HLAWH THENZAWL KHAWPUI

DUHSAK HLAWH THENZAWL KHAWPUI

 ~Hruaia Kawlni

(He thuziak hi whatsapp group pakhata ka chhar a ni a. A ziaktu hian heta suanluh anih avang hian a ngaihaw em lovang chu maw!!. Ed.)

Nimin piah mai Zirtawpni (ni 27 March '26) khan Thenzawl ah sawrkar in thil chinchiahtlak tak tak pahnih Thenzawl khaw tan phei chuan nakin zel a la pawimawh leh tangkai zel tur a ti a.  

   Chawhma lamah Thenzawl PWD Road Division chu Pu Duhoma Chief Minister in a hawng a. Chawhnu lamah Supply Minister Pu Chhanzova chuan Thenzawl Lothazawl hmuna khelmual changtlung tak mai siamna tur lungphum a phum bawk a.

    Heng thil thar pahnih hawnna a kan hotute thusawi atang hian Thenzawl khua in duhsakna an dawn dan leh a khaw mipuite chauh nilovin ram pum tan pawh a tangkai tur anih dan te hi han sawi zau dawn teh ang.

Khawtual Tlangval thusawi :

Thenzawl Tlangval, Aizawl Dawrpui venga inbengbel ta. Thenzawlah inpui te pawh la nei Pu B.Lalchhanzova Minister thusawi atang hian bul han tan phawt mai ila. 

    A sawi danin, Thenzawl hi Lal Bengkuaia lu nghahna hmun, kum 50 lai kal tawh khan "Thlarau miten" Thenzawl hi Mizoram khawpui pawimawh tak anih tur hi an lo hmu tawh a. Tun anga inkalphawhna kawng tha in a tantlang hma daih. Di In hlir ala nih lai atang tawhin, Thenzawl khua rangva in leh lamlian in chhim leh hmar, chhak leh thlang ah a lo chhun tlang sung mai tur te hi thlarau mit atangin an lo hmu lawk tawh, a ti.

Kum tamtak mai Pu Hawla khan Chief Minister ni chungin Thenzawl leh a chehvel hi a lo bial tawh thin a. Vawiin a CM bial an ni leh te hi tihpalh thil nilovin chunglam remruatna niin alang. 

    He Thenzawl khua in hmasawnna a hmuh te hi Mizoram a ramlai leh a chhim lam zel te tan pawh a chhawr tangkai phak a ni zel dawn. Puantah (handloom) lamah pawh Thenzawl hian a bei nasa em em a, Manchester of Mizoram tih ve tlak hial a ni awm e, tiin asawi a hei hi a pawmawm hle mai.

Peace City lamtluang:

CM Pu Duhoma thusawi han en ve leh thung ila. Peace city inbuatsaihna a kal zel a. Master plan siam nan crore 10 pek kan ni a, kan peih tep tawh a. Rel kawng kalna tur hmunhnih ah an han ruahman chhin a, a duangtute hian Golf Course atanga km 5 velah rel station hi awm turin an duang a, keinin a hla lutuk duhleh khawchhung deuh rawn hrut zawk rawh se kan ti a, kan thu ala in hmu chiah lo deuh, a ti.

    Kan hriat atan tha erawh Peace city hi kum hnih khata siam zawh mai chi a ni lo, hunrei zawk aduh dawn tih kan thinlungah kan vawn a tul. Mizo te hian project ropui leh lian tham hi kan hrethiam vak lova. Thlawhhma pawh kum khat atan zel ram vat a kumkhat chhunga athar hmuh hman tum zel, khuarei thlir thiam vak lo kan ni a. Chumi mentality chuan min la chenchilh nasa hle.

   Airport te pawh a siam chhung a rei si a, "Choak bak atum lovang" ti a khatih lai sawrkar nuihzatbur a lo chhuah tum an awm anih kha. Peace city pawh hi Mizoram State capital sawmna tur a ni lova. Khawpui thar, ruahmanna fel fai tak nen a duan a, din tur a ni a. Inthlan 2028 hma a ding uaih tura ngai a, sawrkar lai lo nuihzatna atan hman tum pawl kan awm anih chuan hmathlir thui lo, mi dawn tawi tak an ni tih an tilang mai zawk dawn a ni.

CM sawi danin, India sawrkar hian Green city 12 athlang dawn a. Project 48 hemi chhunga tel tur hian kan inchuh a, midang chuan DPR te an peih vek tawh laiin keini chu master plan pawh kan la peihchiah lo. Chuti chung chuan PM in min ngaihpawimawh sak em avangin tel pha chiah lo kha kan lut ve a. Tichuan a bul tan nan crore 40 lai min ngaituah sak leh der tawh a ni, a ti.

Thenzawl tana duhsakna dang:

Hei bakah hian Lau lui project siam a ni a. Vantawng khawthla bulah ropeway siam nan crore 30 vel dah a ni bawk. Heliport siam a ni dawn bawk a. Helicopter tum theihna satliah ni mai lo, a tui thunna te awm nghal, helicopter lian zawk te pawh tum theihna tur siam tur hian crore 20 lai a awm a, a thawk turin tender te pawh koh tawh a ni. Heng Peace city piah a ruahmansa mek CM sawi ringawt pawh hian heng lai chheh vel chu a ti ropui in, nasa taka Tourist attraction hmun nih belh theihna tur a ni.

Heng mai hi ala ni lo cheu, Mizoram a, ahma sa ber tur Thenzawl Heliport bula Sericulture hmun ram zau takah hian state sawrkar senso nilovin centre changtlung tak din a ni dawn bawk a. Sawrkar hmasa lamin Golf Course an lo siam tawh te hi upgrade a ni bawk dawn.

Aizawl to Thenzawl inkar kawng bik hi Peace city te anih dawn vangin National Highway ah siam an ni leh zel tur te hi thil lawmawm tak a ni.

Road Division Thar

Heng hmasawn hmachhawp pawimawh tak tak kan sawi bakah hian nimin piah lawk a CM in road division a hawn thar chungchang pawh hi tlem han sawi ila.

"PWD hi kan ram rorelnaa Pathian ram a thlen nana Department pawimawh ber niin ka hria a, PWD-ah hian Pathian ram a thleng mêk niin ka hmu a ni." ti hialin CM hian he hun ah hian asawi.

Thenzawl Road Division hi ruahman lawk ang chuan April ni 1, 2026 aṭangin mipui dawr theih a ni ang.

 Thenzawl Sub-Division chu June ni 8, 1977 khan hna an thawk ṭan tawh a ti a. Tunah EE hnuaiah Road Division a awm ta a, Thenzawl, Buarpui, Aizawl leh Lunglei kawng enkawltu a ni dawn a. PWD Division 5 te nen heng kawng te hi an enkawl tawh ang a, Bunghmun Sub-Division pawhin a zawm tawh dawn.

Thenzawl Road Division-ah hian thawktu EE, JE, UDC, SA, LDC Driver leh Group D engemawzat an awm dawn a, thawktu lâk phalna an hmuh nual tawh tih E-in-C Pu H. Zoramliana chuan a sawi.

Lothazawl to FIFA approved quality:

Zirtawpni (27th March) chawhnu lama MoS Pu Chhanzova Khuallianna lam hi han sawizui ve leh ila.

  Thenzawl field hi PMJVK scheme atangin crore 11.856 chu nikum June ni 11 khan sanction dawn tawh a ni a. Mizoram State Sports Council hnuaiah thawh tur a ni a. A thawk turin M/s Decor India, Gauhati te thlan niin work order pawh kumin Feb.24, 2026 pek fel an ni tawh.

  A chipchiar chuan sawi vek lo mai ila football ground hi a dung 111 metre avang 76 metre a zau a ni dawn. Grass pawh hi FIFA approved quality 60mm(pile height) phah tur. 

  Pavillion chhawnghnih siam tur chair 200 dah theih tur. Pavillion sir ah RCC gallery pahnih mi 230 ve ve thut theihna siam tur. A hnuai parking atan. Public toilet 5 bakah rualbanlo te hman tur toilet 2 a awm bawk ang. Tui dahna (water tank) litre nuai 1 dawng a keng tel bawk dawn.

He hna bul tan nana lungphum phumtu Minister Pu Chhanzova chuan Thenzawl mipui te chu rilru zautak pu a,  Thenzawl mipui te chauh ni lo, a chhehvel mite tan leh Mizoram pum tan pawh a tangkai taka lo enkawl pui turin a fuih. 

Hmun danga infrastructure tha tak tak sawrkar in a dah a. A awmna veng te rilru put hmang dik loh vanga sawrkar department te nen a thawk ho hleithei lo, a tangkai tur anga hman theih loh a awm fo thin a, minister thuchah hi a pawimawh hle. Barrier free mind kan neih a pawimawh hle.

    Minister hian Social capital kan tih mai vantlang thil, hmasawnna ruhrel intawm kan neih tam hian khawtlang mipui te inpawhna a siam duh a. He field changtlung tak kan neih avangin inkhel thiam kan pung nghal hlut kher lovang, Sports hi chi thumin a then theih a. Competition lam hawi, eizawnna atana hman tlak khawpa thiamna pawchhuak thei ten an hman tangkai rualin, Recreation ang a hmang duh rilru leh taksa hriselna atan te, Insawizawi duhna avang hrim hrim a inkhel ve duh te pawh an leng vek tur a ni a. A pathumna ah chuan Sport leh zirna (Education) hi a kal kawp tlat tur a ni a, ti bawk.

 He a thusawi hi abik  takin thalai ten kan zawm a pawimawh hle.

Thik tham Thenzawl:

Chief Minister pawh in a thusawina ah hian Thenzawl khua tluka nihlawh leh hmasawnna tam tak sawrkar in a chhawpchhuah sak khaw dang an awm lovang a ti hial. CM bial anih hrim hrim vang lam aiin, Thenzawl awmna hmun hian a zir a, chu chu sawrkar hian a hmu fuh laklawh a ni ber. 

Minister Pu Chhanzova sawi angin, Thenzawl hian rilru zau tak pu se. Heng khelmual hring dup leh ropeway siam tur te, Lau lui project leh Peace city ruahmanna avangte hian Mizoram a khualzin hiptu ber, "Thenzawl, The pride of Mizoram" a la ni dawn, a tih ang in Mizoram khaw nihlawhtak leh India ram leh pawn tourist te tlawh chak ber ni turin sawrkar hian  Thenzawl khua hi buatsaih zel teh se.