INC, Mizoram - Manifesto 2023

2023 GENERAL ELECTION

CONGRESS PARTY

ELECTION

MANIFESTO

N0.1 - “TANG PUIHNA”

[Mizoram Economic Development Initiative (MEDI)]

Congress Party-in sorkarna kan siam chuan Mizoramin hmasawnna tluantling leh kai rual tha tak kan neih theih nan kan thawk dawn a. Mizoram mi tupawh, hmasawn tur leh intodelh tura rinawm tak leh taima taka tan latu apiang chu theihtawpin kan chhawmdawl ang. Tang puihna hnuaiah hian tanpuina leh chhawmdawlna hi a Project a zirin cheng nuai bi atanga an mamawh intawm a nih phei chuan cheng Vaibelchhe tel thlenga puih a ni ang.

Ram ropuina leh chakna hi a ram mipuiin ei leh bar leh eizawnna kawnga an dinhmun san a zir a nih angin Mizoram State pawh hemi kawnga kan san chuan kan dinhmun a tha dawn a ni.

 

2023 MLA GENERAL ELECTION

CONGRESS PARTY MANIFESTO

Kum 2023 MLA inthlanpuiah, Pathian leh mipuite zarah Congress Party-in Sorkarna kan siam a nih chuan Mizoramin hmasawnna tluantling kan neih ngei theih nan hetiang hian hma kan la ang:-

1. Kut hnathawktu, hlawhtling mek leh hlawhtling mai thei tur dinhmuna ding, theihtawpa tang mekte tan:-

1)   Kan thar chhuah thiar velna tur, a fur a thala hman theih Feh Kawng (All Weather Road), mipuite mamawh phuhru zo ngei tur, a tam thei ang ber kan siam ang.

2)   Tuilâk (Irrigation) rintlak kan neih theih nan theihtawpin hma kan la ang.

3)   Thei leh thlai chin tamna lai hmun (Specialized Cropping Zone) Entirnan:- Kuhva, Sawhthing, Grape, Tomato, Lakhuihthei, Serthlum, Fu, Dragon Fruit, Iskût, Vaimim, Thingpui, Be chi hrang hrang, hriak nei thlai leh adt. chin uarna hmun tan ruahmanna (Scheme) siamin, thar chhuah hralhna (Marketing), thiar velna (Transportation), man chawi lo a dah khawmna (Godown), a thlawna vawnthatna hmun (Cold Storage), sawngbawlna hmun (Processing Unit) a thar din leh a awm sa tih changtlun leh thil tul dang dang kan ngaihtuah ang.

4)   Thei leh thlaite, rannung, tâm hri, sik leh sa danglam leh khuarel chhiatna laka an him theih nan a venna lam kan ngai pawimawh ang.

5)   (i) Thei leh thlai thar hralhna (Agriculture Marketing) hlawhtling tak kan neih theih nan hetiang hian hma kan la ang:-

                    (a) Dahthatna leh sawngbawlna (Physical Infrastructure) mumal tak din.

                   (b) Hralh dan tur kalphung (Institutional Infrastructure) rin tlak siam.

                   (c) Market dinhmun zirchianna leh vilvenna (Market Intelligence & Monitoring) mumal tak siam.

                   (d) Dan mumal tak hnuaiah thei leh thlai hralhna viltu (Agriculture Marketing Regulatory Body) kan siam ang a. Hemi hnuaiah hian mumal taka a man bithliahtu (Agriculture Fair Price Commission) leh market dinhmun zirchiangtu leh vilvengtu (Agriculture Market Intelligence & Monitoring Unit) te an awm ang.

          (ii) India ram hmun danga an kalpui mek, Agriculture Produce Marketing (Regulation) Act hi a tha lai lain kan ram dinhmun milin Dan kan siam ang.

          (iii) Eizawnna ngelnghet tur buatsaihna kawngah hian Sorkara Dan leh kalphung kan neih mek thenkhat, awlsamna siamtu leh tanpuitu ni lova harsatna siamtute hi Sorkarin a siam tha ang.

          (iv) Mizoram hmun hrang hrangah kut hnathawktuten an tharchhuah an hralhna tur Farmers’ Market kan siam ang.

          (v) Thei leh thlai chingtute leh a leitu tur Company emaw ten thawhho leh indawr dan (Contract Farming) rintlak tak kan neih theih nan hma kan la ang.

          (vi) Co-operative Society hi Department lian leh tangkai zawk ni turin kan hmang ang a, Sokar laipuia Ministry of Micro, Small & Medium Enterprises (MSME) leh Ministry of Food Processing Industries te thawhpui turin kan Sorkarah MSME Department leh Food Processing Department siam a ni bawk ang.

2. Sorkar ruahmanna hnuaia intodelh tura tang duh, mahnia bul tan ngaihna hre si lote, tan nachang hre lote pawh zirtirna leh kaihhruaina pein

hetiang hian kan chhawmdawl ang:-

     i.        Eizawnna bul tan turte chu Sorkarin an hnathawh tur chungchangah zirtirna leh kaihruaina tha tak pe hmasain a tul angin a chhawmdawl ang.

    ii.        Eizawnna bul tan tur, ram neilote tan pawh ram leilung behchhan kher lo pawha eizawnna ngelnghet an neih theihna tur kawng hrang hrang ruahman a ni ang.

   iii.        Eizawnna kawng thenkhatah mahni tuina leh duhzawng kawng chauh zawh kan tum vek erawh chuan eizawnna tling lovah kan inchhuah tawn theih avangin, khua/veng/bial chhunga chengte mamawh en chungin hmalakna kalpui a ni ang.

  iv.        Eizawnna bul tantute harsatna te, an hnathawh dan en a, chhawmdawl zel tlak an nih leh nih lohte uluk takin enzui zel an ni ang a, an mamawhna zawnah chhawmdawl chhunzawm an ni ang.

    v.        Hmalakna kawngah hian a tul angin Primary Agricultural Credit Society (PACS) leh Self Help Group (SHG) te hman tangkai an ni ang.

3. Thalai, Sorkar hna hmuh loh avanga thawhchhuah nei thei loten, an thiam zawng leh theih zawng hmanga ei an hmuh theih dan tur kawng zawn sakin a tul angin kan chhawmdawl ang.

Kan thalai tam tak, Sorkar hnain a daih loh avanga hnathawh tur tlakchhamna (unemployment) hi kan harsatna lian tak a lo ni ta a. Kan thalaiten Mizoram chhung leh pawna eizawnna mumal tak an neih theih nan hetiangin hma kan la ang:-

1)   Khawvel thang zelin a ken tel eizawnna chi hrang hrang lo pian belh zel hi kan thalaiten an chhawr tangkai ngei theih nan an thawh tur hna bika thiamna an neih theih nan man chawi lova zirtirna bik (Targetted Skill Development Scheme) kan kalpui ang a. Hlawhtlin ngei tuma beitute chu hamthatna ruahmansak an ni ang.

2)   Sumdawnna bul tan duh emaw, industry lam din duhte emaw tan a bika zirtirna (Entrepreneurship Development Programme hnuaiah) uar taka kalpui a ni ang.

3)   India ram hmundangah emaw, khawvel ram dangah emaw hnathawk tur emaw, sumdawng tur emaw chuan computer thiamna tlem a zawng tal leh tawng dang thiam a ngaih avangin computer zirna leh tawng zirna changtlung takin kalpui a ni ang.

4. Mi vanduai bikte, rilru leh taksa lama harsatna neih avanga engti kawng maha tan la ve thei lote tan:-

Kan Party chuan kawng hrang hranga harsatna neiten, thenawmte hmasawnna sang zawk nei tura an intlansiak mup mup laia beidawng leh baihvai taka an damchhung hun an hman reng bik hi rem kan ti ngai lova. Chuvangin, thlamuang tak leh hlim taka an nun an hman theih nan anmahni an inenkawl dan tur (Social Security Scheme) changtlung tak kan ruahman ang a. He Scheme hian damloh nikhuaa an inenkawlna tur te, ei leh in tur an neih reng theihna tur te, chenna in leh an fate zirna atana tanpuina te a huam vek ang.

 

MANIFESTO TANG PUIHNA SAWIFIAHNA

Kawng tinrenga dinchhuah tuma ‘Tan Latute’ chu sorkarin Rs. 2,00,000/- (Cheng nuai hnih) emaw a aia tam pawhin a pui ang. Mi taima leh thawkrim te dinchhuahtir hi ‘TANG PUIHNA’ in a tum ber a ni.

1. MIMAL PUIHNA : Din chhuah ngei tuma tan lak tumte emaw, tan la mek tawh te, lo leh huan thlai nei te, ran vulh te, sumdawnna bul tan duh leh bul tan tawh te, hmasawn zel duhte chu an mamawhna zawnah tak tanpuina Rs. 2,00,000 emaw, an mamawh dan a zirin a aia tam pawhin kan pui dawn a ni.

2. MAMAWH INTAWM : Hnathawktuten District/Constituency/Block Level, khua leh veng, Society/Association/Zau ang zawnga an mamawh intawm chi hrang hrang - Kawng, Godown, Tui lakna, Cold Storage, Sawngbawlna (Processing Unit), etc siamna atan cheng vaibelchhe tela tanpui an ni ang. Hei hi Congress sorkar hmasaah pawh khan NEDP hnuaiah nasa takin kalpui a lo ni tawh a ni.

3. MI VANDUAI BIKTE TAN : Rilru leh taksa lama harsatna neih vanga engti kawng maha tan la ve thei lo ten thlamuang tak leh hlim taka an nun an hman theih nan anmahni an inenkawlna tur Social Security Scheme changtlung tak kan ruahman ang a. He Scheme hian damloh nikhuaa an inenkawlna tur te, ei leh in tur an reng theihna tur te, chenna in leh an fate zirna atana tanpuina te a huam vek ang.

Vawiina ‘Tang’ (Tan Latute) hi puih hmasak an ni phawt ang a. Tang thiam lo emaw tan nachang hre lo emaw thlengin sorkar chuan a tul angin zirtirna, training leh fuihna te buatsaihin ‘Tang’ turin hma a la dawn a ni.

India rama sorkar sum leh pai enkawl dan thlak danglam a nih tawh avangin sum leh pai enkawl thiam tan chuan Tang Puihna Scheme tihlawhtling tura sum leh pai ngai ang chu Budget-a dah theih vek a ni. Congress sorkar lai khan NEDP-ah cheng vaibelchhe 1,000 te kan lo dah tawh thin a. Chuvangin he Tang Puihna tur pawh hi Budget-ah Vaibelchhe tam tak kan dah leh mai dawn a ni.

Tang Puihna hi Sem Policy nen a danglam daih a. A danglamna chu, mamawh tak tak te chauh tanpui an ni ang a. A mamawh lote hnenah pek a ni ve dawn lo a ni. Congress Party-in kan ti ang kan tih chu Pathian leh mipui zarah kan lo tihlawhtling tawh thin avangin kum 2023 Election-ah hian Congress Party-in sorkarna kan siam a nih chuan chhungkaw tin, mimal tinin nasa takin hma kan sawn ngei dawn a ni.

“Tang Puihna hian Mizoram hmel hi a tha zawngin a tidanglam vek dawn. Drugs, zu leh ngawlveina dang lak atangin kan chhanchhuak dawn a. Mizoram mipui hi hnam taima tia hriat kan ni tawh ang.”

 

2023 GENERAL ELECTION

CONGRESS PARTY MANIFESTO

NO. 2 - SORKAR THA

(Good Governance)

Khawvel ram tin hian ram leh mipui kan nei vek a. He thil pahnih thiam taka enkawltu ram apiang hi ram dingchhuak leh hmasawn an ni thin. Ram leh mipui enkawlna mawhphurtu chu SORKAR a ni. SORKAR THA, kan ram leh hnam leh sakhua himna tur kan neih theih nan Congress Party chuan kan Manifesto No. 2 atan SORKAR THA hi kan rawn chhawp chhuak a. Mizoram tana rualkhai taka hmasawnna thlentu tur, sum leh pai enkawl thiam, Sorkar Tha kan neih theihna tur chu hetiang hi a ni ang:

1. CORRUPTION AWM LOHNA SORKAR:

          a) Corruption hi system tha hian engemaw chen veng mahse a kengkawhtu CM ber a that loh chuan a bo tak tak thei chuang lo. Congress kan sorkar a nih chuan kalphung tam tak siamthat a nih rualin, Chief Minister, Minister leh MLA-te corruption lakah an fihlim ang.

          b) Ram hruaitu lute berte an fihlim tlat chuan sorkar hnathawk leh mipuite pawhin entawnin kan corrupt lo ang.

2. DAN RORELNA (Rule of Law):

          a) Sorkar hnathawhna leh thu tlukna siam kawngah te, Sorkar hnathawk lak dan leh Contract hna pekna kawngahte duhsak bik leh thlauh thlak bik nei lovin dan ang takin kan kal ang.

          b) Mipuite thlamuang leh him taka an awm theihna tura dan leh thupek kengkawh ngam Sorkar kan siam ang a, dan lova thil tihna reng reng chu man chhuah a nih chuan hrem lovin an chhuak lovang.

3. LANGTLANG SORKAR (Transparent Government):

          a) RTI Act Section 4-in a phut angin Sorkar hmalakna reng reng mipui tana dil chhuah kher ngai lovin Sorkar Website-ah tarlan thin a ni ang.

          b) Sorkar hi mipuite ta, mipuite tana din a nih angin a hmalakna reng rengah langtlang takin a kal ang. Sorkar hnathawh dana rawtna neiten engtik lai pawhin Chief Minister Office-ah an theh lut thei ang.

4. THUNEIHNA SEM ZAI (Decentralisation):

Mizoram kilkhawr ber atanga Aizawl kal ngai vek deuh thaw khawpa thuneihna Aizawla dahkhawm tlat hi siam thain, mipui tana tangkai zawka hna an thawh theihna turin District, Sub-Division/Block, Municipal Body leh Village/Local Council-ah thuneihna leh mawhphurhna semzai a ni ang.

5. SMART GOVERNMENT:

          a) Mipuiin Sorkar atanga an thil mamawh hrang hrangte awlsam zawka an hmuh theih nan an tualzawl ngeia sorkar office hun hnaih sakin, Ration Card, Adhaar, Healthcare, huan lo ram Pass, adt. chungchanga awlsam zawka Sorkar an dawr theih nan hunbi neiin ruahmanna siam a ni ang.

          b) A theih chin chinah E-Governance kalpui a ni ang a, Sorkar chu mipui tan ralkhat atanga Online-a dawr theih a ni ang. Mahnia dawr thiam lote tan Common Service Centre (CSC) awm sate tichangtlungin, Centre tam zawk siam a ni ang.

          c) Sorkar tana hna chak, hlawk bawk si leh sum tam tak hum theihna  Privatisation hi uar a ni ang a. Contract hnathawh dan tha zawk - Build, Operate & Transfer (BOT), Engineering, Procurement and Construction (EPC) leh Public Private Partnership (PPP) Mode-in hna tam tak hi thawh a ni ang.

          d) Hmasawnna hnathawh reng rengah ram leh mipui tana tangkai, chhenfakawm leh rotling tur ngaih pawimawh a ni ang.

          e) Mizorama data inang lo tam lutuk, entirna’n, Department hrang hrangte BPL zat inang lo, adt. siamtha a, data inang vek kan hman theih nan One State, One Statistics nei tura hmalak a ni ang.

6. SORKAR VIAK THA LEH MIPUI RIN NGAM:

          a) Ram leh mipui tana tha ber tura thu tlukna siam a, dik tak leh huai taka kalpui ngam, mipui harsatna an tawh changa rang taka hma la thei, innghahna tling Sorkar kan siam ang.

          b) Mipui leh Sorkar hnathawkte ring ngam, mipuite leh Sorkar hnathawkte tan pawha rin ngam, thil tha tih awlsamna leh thil sual tih harsatna, chhung lam leh pawn lam atanga hruaisual theih loh leh thurawn tha dawngsawng thei Sorkar kan siam ang.

          c) Sorkar hnathawkte hi Sorkar kutke ber an nih avangin an tana tha zawk OLD PENSION SCHEME (OPS) hi hman leh a ni ang a. An hamthatna hrang hrang - DA, DR, GP Fund leh Pension Benefits-te hi a hun taka pek an ni ang.

          d) Mizoram Sorkar kalphung siamthat ngai laite siamtha turin Administrative Reforms Commission kan din ang.

 

2023 GENERAL ELECTION

MANIFESTO No. 2 SAWIZAUNA

Sorkar tha siam tur hian Sorkar kalphung hman mek, ramin kan thatpui si loh tam tak tihdanglam a, Manifesto anga kawng thar zawh turin a tul chuan Political Will neiin, tlak pawh huamin hma kan la ang a. Khawih danglam tur tam tak zingah a pawimawh zual pathum chu heng te hi an ni:

            1. Cabinet Sub-Committee on Reforms : Sorkarin hna a thawh dan turah tihdanglam ngai tam tak a awm a. Department zawng zawng te kal phung leh an thawh dan kawngah a tul anga siamremin mipui tana hlawk thei ang bera an thawh theihna tura din a ni ang. Party Manifesto bakah thawh tur tha tam tak thawk thei turin he Cabinet Sub-Committee on Reforms hi din a ni ang.

Minister te’n Minister an niha an thutiam vawng rengin mipui chu hleih nei lo leh thliar hranna nei lovin dikin a bul an tan ang a. Department te’n an lo kal thin dan tha lo zawng zawng te kalsanin Cabinet Sub-Committee on Reforms remruat ang thlapin hna an thawk ang a. Ngaih pawimawh tur tam tak zingah a pawimawh langsar zual tlem chauhva hmalakna tur hetiang hi a ni ang:

2. Thuneihna Leh Mawhphurhna Sang Zawk Inpek: Ram rorelnaah hian thuneihna semzai leh mawhphurhna inpek (Decentralisation) hi Sorkar tha neihna hmanrua a ni. Autonomous District Council te, Administrative District, Sub-Division, Development Block leh khawpui leh thingtlang enkawltu - Municipal Corporation/Council leh Village Council te hi thuneihna leh mawhphurhna sang zawk pek an ni ang.

Mipui rorelnaa a hnuaihnung ber, Village Council-te pawh hi Sorkarin thuneihna leh mawhphurhna sang zawk a pe ang a. An huam chhunga an mawhphurhnaah chuan thuneihna leh mawhphurhna famkim neihtir an ni ang. Chhungtin aiawh telna, Vantlang Inkhawm (Gram Sabha) hi rorelna chhawng sang zawka awm ve lo a ni a, hemi hmang hian Party, Pawl leh laina hnaite duhsakna emaw mihring retheihna avanga inthliar hranna nei lovin, mi zawng zawng te hmuh leh hriatin ro an rel dawn a ni. He Vantlang Inkhawm hmang hian BPL, Tang Puihna, mirethei insak tanpuina etc. thlan chhuah thin a ni ang a, heta tang ber hian mitin chungah Dikna Lal Tiang chu kenkawh a ni dawn a ni.

3. Eirukna tihbo leh Lokayukta chak siam : Sorkarah eirukna hi a chhung atanga natna leh a nget an nih avangin Sorkar sum hi dik taka hmang turin leh eiru te tana hremna pumpelh theih lohna turin Lokayukta hi thuam that a, tih phuisui a thuneihna sang zawk pek a ni ang a. Sorkar hi eirukna hmanga hausak tumtute hmanrua a nih loh nan Lokayukta hi hlauhawm leh hman tlakah siam a ni ang. A ler atanga kan thianghlim

theih nan Chief Minister leh Minister te thlenga chhui an nih theih nan Lokayokta hi ama

puala Prosecution Wing leh Investigation Wing din sak a ni anga, a duh hun huna Central Bureau of Investigation (CBI) a hman theih nan Sorkarin Lokayukta hi thuneihna pumhlum (General Consent) a pe dawn a ni.

 

MANIFESTO

ELECTION MANIFESTO NO. 3

1. Zirna (Education):

Zirna (Education) hi mihring puitling leh hman tlaka siamna hmanraw pawimawh ber a nih avangin National Education Policy, 2020 hi Pre-Primary atanga University thlengin kan State mila siamremin a tha lai apiang hmangin a tha lo lai te paihin kan hmang ang.

          (a) Class XII pass, zirna sang zawk zir chhunzawm duh, BPL chhungkuaa mi te hnenah zirna puitu, Laptop kan pe vek ang;

          (b) Thingtlang atanga khawpuia zirna chhunzawm tur, awmna tur nei lote tan Rural Students’ Hostel kan siam ang;

          (c) College naupangte tan Students’ Exchange Programme leh Excursion/Study Tour atan kum tin Budget-ah sum tam zawk kan dah ang;

          (d) School-te hi an dinhmun enfiahin siamthat ngai apiang leh dinhmun sang zawka hlankai ngai te kan ngaihtuah tha leh vek ang;

          (e) MBSE Syllabus leh an Examination System hi zirna tha zawk leh khawvel thang zel milin kan siamtha vek ang;

          (f) Zirtirtute tan Voluntary Retirement Scheme (VRS) kalpui zel a ni ang;

          (g) Kohhran School enkawlna tha entawnin Sorkar leh Private School-te dinhmun hi ennawna siamthat vek an ni ang;

          (h) Mizoramah hian Pathian thu zirna changtlung zawk neih nan Kohhran ten Mizoram Christian University din tura hma an lak chuan a hlawhtlinna turin Sawrkarin a tanpui ang.

2. Mihring Hriselna (Health Services) :

          (a) Mizoramah Super Speciality Hospital din turin hma kan la ang;

          (b) Mizorama Health & Wellness Centre, Primary Health Centre, Community Health Centre leh District Hospital zawng zawngte hi a building, an hmanrua leh a thawk zawng zawngte ennawnin an dinhmun kan tichangkang vek ang;

          (c) Zoram Medical College (ZMC) hi Regional Medical College/ Institute emaw AIIMS type Institution-a leh a nih theih nan hma kan la ang.

          (d) Naupang Hospital leh Research Centre kan din ang;

          (e) Private Hospital din turte tana zawm tur kaihhruaina (Guidelines) mumal tak siamin kan kengkawh ang;

          (f) Sorkar hnathawk nghet awm lohna chhungkaw tinte hnenah pawisa hman hmasak ngai lo (Cashless)-a an inenkawl theihna turin Health Isurance Cover Rs. 15,00,000/- (nuai sawm panga) thleng an hman theihna tur pek an ni ang.

          (g) Cancer leh natna harsa zual bik vei inenkawlna la mekte tan kum tin Budget ah Rs. 5,00,00,000/- (vaibelchhe nga) kan dah ang a, Cancer Hospital Khualbuk pawh kan tichangtlung bawk ang;

3. Power :

          (a) Electric Power supply tha leh rintlak zawk, man man taka mipuite mamawh ang zela Mizoram hmun tinah kan neih theih nan Power Sector Reforms kalpui a ni ang.

          (b) Electric Power hmangtute tan phurrit belhchhah lo zawngin a theihna apiangah Hydel Project leh Solar Project te kalpui a ni ang. Hemi atan hian Technoeconomic Feasibility Study dungzuia hma lak a ni ang.

          (c) Electric Power hmangtute bill a san zel loh nan leh kan power mamawhte a tlawm thei ang bera kan hmuh theih nan tariff-based competitive bidding system hman thin a ni ang.

          (d) State pawn atanga Electric Power Supply tam zawk leh rintlak zawk, tlawm zawka kan hmuh theih nan Regional Power Transmission System ti changtlung turin hma lak a ni ang.

          (e) Power Department-a siam that ngai apiang kan siamtha ang a. Electric Bill dik taka siamin, BPL chhungkuate tâna a zângkhai thei ang ber turin ruahmanna kan siam ang.

4. Police Department:

          (a) Police Department-ah hian hnaruak a tam êm êm a. Hengte hi a tam thei ang ber kan hnawh khat ang a. Hmeichhia tam tak an luh ve theih nan ruahmanna kan siam ang

          (b) Rifle Allowance hi Rs. 300/-ah kan tipung ang.

5. Sports & Youth Development Dept.

          (a) International Standard Sports Coaching Centre kan din ang a, thalaite tuipui zawng Sports discipline-ah Coaching tha kan neih theih nan hma kan la ang. Khello Centre of Excellence hi an mamawh anga sum nen thuam that a ni ang a. Coaching Centre leh Club te nen thawhhona thuthlung kan siam ang.

          (b) Northeast Centre for Excellence in Music & Fine Arts kan din ang.

          (c) Kan thalai ten foreign rama hna(placement) an hmuh theihna turin leh awlsam zawk leh him zawka ram danga hnathawh dan ngaihtuah turin sorkar in Ministry of Foreign Affairs leh Foreign Embassy te thawh theihna tur Employment Agency ruahmanna a siam a ni ang.

 

6. Environment & Forests :

          (a) Hmasawnna hna thawh anih reng rengin kan ram lui, ngaw leh nungchate humhalh chunga thawh zel a ni ang.

          (b) Bamboo Policy kimchang tak kan buatsaih ang a, Mau hi kan rama kan neih sa hman tangkai a, Selective Harvesting (Mau upat dan ngaihtuaha lakkhawm dan) ngaihtuah chungin Bamboo Plantation siam ngaih pawimawh a ni ang.

          (c) Mau atanga eizawnna ngelnghet tam tak hi hai chhuak tur leh a tul anga Technology leh Training te buatsaih a ni ang.

7. Animal Husbandry & Vety.:

          (a) Sa, bawnghnute leh artuia kan intodelh theih nan Rural Animal Husbandry Centre (RAH Centre) leh Veterinary Hospital-te siam belh thuam that a, a thawkte pawh a tul anga lak belh a ni ang.

          (b) Ran chaw leh ran damdawi kan mamawh hi kan ram atanga intodelh thei turin hma kan la ang.

8. Fishery :

Kut hnathawktute tana eizawnna a hman tlak tur sangha thar chhuah dan kawng dap a ni ang.

9. Sericulture: Khawvel sik leh sa inthlak danglam avangin Muga silk thar chhuah nan Mizoram hi duhthusam a lo ni ta a. Chhungkaw sing telin Muga silk thar chhuah hi eizawnna hlawk leh ngelnghet atan an hman theih nan ruahmanna ziktluak siamin hma lak a ni ang. Maimaw pangang khawi lama hmasawn turin hma lak a ni ang.

10. Food, Civil Supply & Consumer : Buh thar chhuah tam hi intodelhna a nih avangin Central Sorkar pawhin a remtih angin loneitu te buh thar chhuah a tul angin lei sak a ni ang.

11. Co-operation:

Kut hnathawktute leh mahni kut kawiha eizawngtu ten ngelnghet leh hlawk zawk a an eizawnna an kalpui theih nan Cooperative System tih changtlun leh tih hmasawn a ni ang.

12. Agriculture :

          (a) Kut hnathawktute leh mahni kutkawiha eizawngtute nghelnghet leh hlawk zawk a an eizawnna an kalpui theih nan Co-operative Society System tih changtlun leh tihhmasawn a ni ang.

          (b) Loneitute leh thlai chingtu tam takin an hman tangkai theih turin Agriculture Department hi her rem niin, Office dawhkan aiah loneitute hnathawhna hmun chu Officer leh thawktu dangte hnathawhna hmun anih zawk tawh nan Sorkarin hma a la ang.

13. Drinking Water Supply :

          (a) Mizoram hmun tina tui intur thianghlim tam tawk mipui ten an hmuh theih nan hma thar lak a ni ang. Chumi atan chuan tui hnar venhim leh vawn thianghlim bakah tih changtlun a ni ang. A tul dan azirin tui dah khawlna (reservoir) te pawh siam a ni ang.

          (b) Tui renchem leh a tihpun kawnga hmalak a nih rualin mirethei te ban phaka Tui Supply Rate hi ennawn a ni ang.

14. Aizawl tan Planned City buatsaih :

          (a) Aizawl hi chen hleih theih loh khawpin kan chep ta a, khawpui area zauh emaw Aizawl hnaia Aizawl Thar din emaw hi kan ngaihtuah ang.

          (b) Aizawl khawpui chhunga lirthei tawt lutuk tihziaawm nan traffic congestion tam zualna hmunah te a theih dan anga flyover siam a ni ang a. Multi-Level Parking leh Aizawl area chhung emaw dai pawn remchangah Aizawl City Bus, Maxicab, Taxi, Two-wheeler dinkhawmna (Stand/Terminal) buatsaih a ni ang.

15. Lunglei khawpui zauh nan chhuah lamah kawngpui : Lunglei khawpui chhunga lut lova Lunglei By-Pass Road siam a ni ang a, Lunglei khawpui zauh nan leh khawpui tawt lutuk tur ven nan Lunglei khaw chhak lamah kawngpui siam a ni ang a, Tuilak pawh tihchangtlun a ni ang.

16. District Headquarters dang zawng zawng pawh an than zel dan tur ngaihtuahin Master Plan kan siam ang a. Tuilak pawh a tul angin kan tichangtlung ang.

17. MGNREGS dawng ve lo khawpuia cheng te tan Urban Employment Scheme kan siam ang.

18. Tar Chawmna (Indira Gandhi Old Age Pension Scheme) pek dan hi kan ennawn ang a, Pension hi thla khatah Rs 2,000/- ah kan tisang ang. Hemi atan hian Mizoram State Old Age Pension Scheme kan siam ang.

19. National Social Assistance Programme (NSAP) hnuaia tar te, hmeithai chawmtu nei lo te, rual ban lo te, eizawngtu ber boralsan chhungkuate tanpuina dawn hi kan State suma belhchhahin kan ti sang ang.

20. Kum 2014 atanga Central leh States/UTs te sum insem dan danglam ta hmang tangkaiin Central atanga a tam thei ang ber sum hai lut turin ruahmanna fel tak siam a ni ang.

21. Khawpui leh hmun hrang hranga thlai leh thei zuarte hi chhungkaw tam tak tan an eizawnnaa an innghahna a nih avangin Sorkarin an tan remchanna leh tanpuina a siamsak ang.

22. Mizo sumdawng te hi hnam humhalhtu an nih avangin an dinhmun chawikang tur leh an harsatnate sukiang turin Sorkarin hma a la ang.

23. Kan thalaite tan Sorkar hna bakah zirna lama thiamna leh kut themthiamna lama chak zawka hma la turin Capacity Building Training atan ITI leh te, Polytechnic tihphuisui leh siam belh a ni ang.

24. Mizo thalaite min suat chho mektu Drugs/AIDS te hi Kohhran leh NGO-te nen mumal takin kan do let ang a, a tuar mektu tam takte chhanchhuak turin De-Addiction leh Rehabilitation Centre enkawlna ennawnin a tul angin hmalak a ni ang.

25. Sorkara thurawn tha pe thei tur Civil Society Pawl tam tak telna Chief Minister

ho tur din a ni ang.

26. Naupang tana chaw tha pek nan an puala ‘Health Food Supply of Nutrition for Mizoram Children Scheme’ buatsaih a ni ang.

27. ‘Restricted Tender’ hman dik loh tihtawp hi Corruption tihbona tangkai tak leh ram ro (Assets) siamna kawnga hna tha thawh nan a tul avangin kan hna hmasa a ni ang. Open Competitive bidding, langtlang taka hnathawk tur thlan hi Corruption tihbona hmanraw tha a ni a. Restricted Tender hi tul bik thilah chauh dan zawmin hman a ni ang.

28. North East Centre for Excellence hi kawng tam taka thalaite’n ‘State of the Art Facilities’, Zirna tanpuina, Workshops & Masterclasses, Exhibition & Performances leh Khawvel ram zau zawka ‘International Exposure’ neih nan kan din ang.

29. Young Mizo Entrepreneurship Programme (Ym Elevate) hi Mizo thalaite tan Startup Funding leh hna nuai khat buatsaih a ni ang.

30. LAND REFORMS:

Ram (Land) hi mipuite ro hlu ber te zing ami a ni a, hmasawnna hna reng reng hi ram tel lovin a thawh theih loh tluk a ni. Ram chungchanga dan kan neihte ennawn a siam that leh tih changtlun a ni ang.