Kan Khua - Thenzawl

 KAN KHUA -- THENZAWL

~Lalrina Chhakchhuak

Lalrina Chhakchhuak

Kan khua Thenzawl hi Mizote zinga a hming hre lo an awm lovang a...tih tur khawpa khaw lar ve tak a ni a. A awmna hmun pawh Mizoram laili laia awm niin, a hmun a rem ve viau a ni.

Kan khaw chanchin hi sawi ṭeuh tur awm mah se, danglam ve riauna a neih tlem a zawng kan sawi ve mai mai teh ang.

1. Kan khua Thenzawl hi kan sawi tawh anga khaw hmun rem ṭha tak a ni a. Fur hun a lo thlen a, ruah an sur ve bur burte hian, lei han tawlh mai tur hlauhthawnawm emaw, lei min mai hlauhthawnawm awm ve vak ngai ta lo chu...Zan lama ruah sur bur bur changte hian "Mut a nuam..." kan ti then ṭhin.

2. Fur ruahtui tlak vanga hnawngin thawmhnawa hmuar a siam duh ṭhin ang hi kan khuaah hian sawi tur kan nei lo ang reng hle a. A danglam ve viau a ni.

3. Kum khat chhunga hunpui inlumlet, Nipui, Fur, Favang leh Thlasik hun lo inher chhovah hian, Thlasik boruak a rawn inher chhoh ṭan hian, khaw ṭhenkhat aiin a vawt hma a. Khawvawh vanglaite hian, "Vur a tla..." tiin zingkara dai lo khal var tiarte hi hmuh tur a awm ṭhin. 

4. Thlasik boruakin ziaawm lam pan chhovin, nipui an rawn thaw ṭan a. Nipui lai chuan 'Thenzawl chu khawlum tak' nia hriat hi  a hlawh viau nain, nipui laia Mizoram khaw nuam ber pawl ni pha vein kei chuan ka hre ṭhin.

A chhan chu, nipui lo thaw chho ṭan, ram mipui tam takin "a lum mang e..." kan tih chhoh vel laite hian, chhun lamah khawlumin min tuam ve mah se, tlai boruak a rawn ni chho a, Ni kawla an liam meuh chuan, boruak hi a dai duai  zel  a. March thla, khawlum  chhoh vanglai nia hriat hunah te hian, zan boruak a la dai nuam em em a. Chhun lamah pawh thlifim a thaw ṭha ṭhin hle....

5. Mizoram khaw len zawngah eng din hmun chiaha ding nge kan nih ka hre chiah lo na a. In sanghnih chuang khua kan ni ve tawh a. Branch YMA pawh pakua lai kan awmin, V/C pali lai kan awm bawk a. Heti chunga Chhiatni bika kan la inṭawiawm ṭha em em maite hi kan khua tinuamtu, hlûtna neia siamtu a niin ka hria a ni. Mihring pawh a bikin ṭhalai chin phei chu an inhre pawh ṭha hle bawk. 

6. Sawi tur tam tak awm mah se, a tawp nana kan khaw chanchina sawi ka chak ber chu.... Kan kut a ram lo...tih hi a ni.

Tute emaw huaikawm bawl an lo awm emaw, mikhual tlangnel deuh, han ruih deuh ṭuma awm dan tawk thiam vak lo emaw, thilsual ti man emawte an awm chang pawh hian, kan khua Thenzawl hi kan thin a nêl tlat zel asin...! Chumai chu ni lovin, rawng taka insawisak ang chi te hi a thleng khatin, chutiang ang lo awm ve chunte pawh khual aṭanga lo pemlut emaw, khawtual mi ni lo aṭanga thil lo thleng a lo ni leh fo ṭhin.

Haw hawa inrawtpawra a huhova thil fel tawk lo han tihchiam ang chi te hi a vang pharh mai a ni. 

He kan khua Thenzawl hi...sik leh sa boruak thuah te, mihring nun zalenna thuah te hian a nuam a, mahni khua na na na chu kan han sawi ve deuh hlak a ni e.....